有線娛樂台靚女主播劉明軒喺今個星期一結婚，新郎哥係同佢拍拖一年嘅友邦保險資深區域總監王傲山（Marcus）。
FBI醒起同唔少娛圈中人熟絡嘅Marcus，喺10年同過李彩華（Rain）拍拖，二五亦即刻打畀FBI報料，話查實Marcus只係表面風光，佢同Rain拍拖期間就試過不下一次問Rain借錢，後來Rain向寰宇前老闆娘趙雪英呻，心水清嘅趙雪英當然勸Rain唔好借，最後Marcus更因為有新女而同Rain分手，真係祝劉明軒好運！
娶有線主播
王傲山同劉明軒拍拖一年就結婚。聽講王初初同劉拍拖嗰陣，仲有個馬來西亞籍女友，但劉明軒迫到佢同正印分手。不過劉明軒亦唔係次次都成功夾到佬，佢曾經同恒生銀行創辦人後人何乃斌拍拖，並共同擁有一層過千萬的淺水灣豪宅，但分手後被對方追討業權，劉明軒唔單只冇樓分，仲要自付百幾萬律師費。
喺保險業做咗超過10年嘅Marcus（後排右一）同好多娛圈人熟，蘇永康、梁漢文，仲有許志安更同Marcus稱兄道弟。
