21歲女歌手鄧紫棋（G.E.M.）公開鬧爆商台講一套做一套，估唔到她經理人張丹更勇！手下得間蚊型唱片公司同一個歌手咁大把，講到明《叱咤》唔夠獎分係因為環球同商台關係密切，夠薑抗衡全港樂壇潛規則。
寸得起，皆因有本錢又有heart！今年34歲嘅張丹，25歲時已經靠賭場老虎機月搵一億，貼錢做唱片全為理想：「中國人社會，無論政治定經濟，都弄虛作假靠關係，如果連音樂都要關係先可以流行，我哋仲剩番啲乜？」
點樣改變樂壇？
9年前，父母做生意的張丹25歲已經搞賭置富，為圓音樂夢貼錢開唱片公司：「喺澳洲讀完大學我去咗美國學音樂，最大收穫係學識美國人如何將夢想執行成為現實。」
G.E.M.15歲便簽畀張丹，當年小巨肺如今夠膽鬧商台，G.E.M.因此被藍奕邦uncle抨擊唔夠謙虛，張丹話：「謙虛就唔好做歌手啦！表演者係應該有態度有自信！」
我父母喺文革期間嚟香港，袋住百幾蚊，轉咗廿幾份工，慢慢投資置富。出世時我屋企住上水新田嘅石屋，跟住由石屋搬板間房、廉租屋、再搬入美孚新村、細單位再轉大單位，到我中學，屋企搬咗去西半山。
我同哥哥喺澳洲讀大學，見到人哋啲老虎機又靚又新，葡京就得走廊嗰幾部，污煙瘴氣又欠服務，因為我父母做生意（投資及地產）識何生（何鴻燊），於是同何生傾，引入新老虎機入澳門，佢支持我哋、又肯投資一半，條件係，要帶埋何猷龍入澳門。我哋由80部老虎機做到600幾部，每晚收入300萬，一個月加埋已經近億，兩年後，賣晒股份畀何生，賺到嘅錢，已經夠過世，嗰年，我25歲。
25歲手頭上有咁大嚿錢，興奮嘅唔係數字。當你知道自己可以令夢想成真，仲點會擔心賺唔到錢？攞住嚿錢，哥哥選擇留喺澳門做地產，我就返香港搞唱片公司。
十幾廿年來，台灣、內地人入晒腦，覺得喺香港，流行嘅嘢就一定唔好，地下反而搵到好嘢。點解啫？我帶G.E.M.打入內地市場，一聽係香港歌手已經皺晒眉，講多句佢喺香港受歡迎，再扣多幾分，為乜呢？啲人話G.E.M.唔謙虛，謙虛就唔好做歌手啦！表演者係應該有態度有自信！我哋出聲，唔係為咗錢，係想香港人都可以聽到好音樂，係唔想只得純商業、靠關係嘅嘢至可以流行。
以前樂壇興旺，做音樂賺幾百萬，就話為利益搞關係啫，𠵱家做音樂已經冇肉食，點解只係仲睇緊眼前利益呢？
揸跑車、住豪宅，又在澳門擁有5千呎別墅，張丹話搞唱片為理想唔為錢。成立唱片公司頭炮發掘澳門組合Soler，06年關係破裂，Soler被判賠償張丹508萬，無力償還宣布破產。
