杜德偉去年11月11日光棍節迎娶26歲嫩妻Ice，新婚燕爾當然甜到漏，佢哋大前日（6日）拍拖去咗天后嘅日本城買廚具同家品，全程有商有量。當日下午4點，50歲嘅杜德偉一身潮爆打扮，同老婆戴埋情侶帽外出，佢哋先喺中環攞車直駛去天后。
杜德偉亡母張露臨終前話過好擔心阿仔嘅生活，但就大讚Ice廚藝最啱杜德偉胃口，升呢人妻嘅Ice當然要煮多啲住家飯，工欲善其事，必先利其器，Ice當然要為愛巢買番啲新廚具，佢非常慳家，特登去平民化嘅日本城掃平貨，佢哋仲專攻九折貨架。其間仲聽到Ice提到稍後要為請客回家食飯做準備，不過杜德偉就話未知，Ice猛哦佢：「點會未知。」杜德偉都唔敢駁嘴，佢買完家品埋單，兩公婆又過咗隔籬一間雜貨店，不過杜德偉睇咗一陣嫌悶，佢先返車等，Ice快快趣買完嘢，佢哋就開車返天后廟道威景台新居。
杜德偉同老婆Ice新婚燕爾，日前佢哋去掃平價家品，但係全程Ice不斷咁哦老公，而杜德偉就好似好慄咁唔敢駁嘴。杜德偉同Ice去年先喺香港結婚，再喺台灣擺酒鬼咁恩愛。
兩個人行極都睇唔啱，Ice蹺埋手唔耐煩，Alex繼續唔敢出聲。最後Ice又去咗另一雜貨舖，終於買成一件白色家品。
From:
http://hk.apple.nextmedia ... 130109/18127353
