假公平、真霸道，叱咤樂壇頒獎禮年年標榜公信力，其實自己人玩晒一直是公開秘密，不過商台夠惡，唱片公司又要賣佢賬，小歌手邊敢出聲？
估唔到G.E.M.唔只個肺巨，膽都大過人，週日（12月30日）更公開一段錄影，怒插叱咤年年講一套做一套，宣布缺席今年叱咤頒獎禮以示抗議！
雖然唔係個個似阿G.E.M.咁勇，僅得到極少數同業聲援，經理人張丹就話唔後悔造反，仲繼續爆黑幕：「自從Kary吳雨霏入咗環球，我最喜愛女歌手5強就開始唔夠分！」
逢到年終頒獎禮季節，例牌有各式分獎唔勻是非連環上演，標榜以專業評審同播放率做指標，選出我最喜愛男、女歌手以及歌曲獎嘅叱咤自稱全行最公平，其實由高層甘菁菁話事，新入商台的陳志雲亦唔多理。叱咤被甘氏夫婿黃劍濤（Duncan）主理嘅環球旗下歌手玩晒，年年逆民意爆大冷見慣不怪。
叱咤元旦舉行，G.E.M.就早兩日拍片示威，宣布今年會缺席叱咤頒獎典禮以示不滿，佢個YouTube頻道有75,000 fans 6,300萬點擊，使鬼怕商台？經理人張丹：佢一入環球唔夠獎分！真實對白
雖然冇講出口，不過G.E.M.話有頒獎禮結果誤導大眾，加插叱咤頒獎片段及一人一票口號，擺明講緊商台。
棄獎造反
公平與否大家心裏有數，不過夠膽出聲就冇乜幾個。元旦日叱咤頒獎禮揭幕前夕（12月30日），G.E.M.（鄧紫棋）在YouTube、優酷等多個主流視頻網站上載自拍短片稱：「如果我冇得獎，台上得獎嘅係優秀歌手，我係心悅誠服。網絡興起，令歌迷可以主動去搵好質素嘅作品。你一年一度搞event係冇問題，但你忠於你自己，如果你表達嘅嘢同你做緊嘅嘢係唔一致，咁就唔公平，更誤導咗人。」一路講，剪片一路加插叱咤頒獎禮片段，及「一人一票」宣傳字句，加上G.E.M.一早宣布今年會缺席叱咤，矛頭指向商台明確不過。
唔鬧無綫、新城，經理人張丹解釋：「因為無綫同新城嘅遊戲規則一早講到明，冇標榜係一人一票，我哋尊重賽果。」商台助理總經理甘菁菁同環球高層黃劍濤份屬夫妻，咁啱近年叱咤重要獎項都係環球包攬。《壹週刊》圖片
「根本就唔係民意！」
有指G.E.M.冇獎發爛渣，經理人張丹就否認：「叱咤一直有播G.E.M.嘅歌，〈What Have You Done〉仲攞過專業推介第一位，據我哋所知，本來我哋有一首歌曲獎（叱咤十大），不過𠵱家唔出席唔知仲有冇。其實無綫、新城講到明遊戲規則係內定，我哋尊重，但叱咤標榜一人一票民意結果，據我所知根本就唔係民意。G.E.M.出道第2年已經打入女歌手5強，係前年開始Kary（吳雨霏）入咗環球，啲獎至唔夠分之嘛！」
早於11年謝安琪離開、吳雨霏轉會加入環球開始，Duncan已一心谷Kary上天后位，早前就有報道指Duncan今年點名指定Eason、Kary及林德信一定要有獎，成件事變成咁，商台今次都有排解畫啦！
冷漠同業
G.E.M.開聲表達不滿，源頭微博極少歌手轉發及評論，夠薑撐G.E.M.嘅只得rock友黃貫中及一樣杯葛過叱咤嘅何韻詩，面皮夠厚反G.E.M.擦商台鞋嘅同樣為數不多。
讚勇派
擦鞋派
甘菁菁幕後操盤
甘菁菁每週例會定下playlist，然後由交畀旗下4大DJ分發執行。
據知情人士透露，商台DJ每星期會收到一張歌曲playlist，每年臨近頒獎禮約9月開始，某部分歌手會突然從playlist絕跡。DJ跟足playlist播歌，令部分唱片公司力捧歌手得益，唔跟足就會得罪頂頭上司，至於份谷歌邊個拍板？之唔係商台助理總經理甘菁菁囉。
DJ良心/違心話？
梁兆輝~「我90年代做商台，當時的確係靠播放率，電台的確付出咗Air time至令到首歌跑出，但唱片公司同電台之間千絲萬縷嘅關係，利益輸送少不免。話一人一票，不如透明度再多啲，真係交個波畀大眾，咁拗撬咪少啲囉。」
阮小儀~「我梗係投Rubber Band一票啦，Rubber Band冇入5強我都失望㗎，個個歌手都覺得自己fans多，但你估唔到可能人哋fans仲多呢？叱咤係一人一票投出嚟，我相信個賽果㗎！」
Donald~「首歌好聽，我哋就一定會播。希望G.E.M.明白，佢初出道時可能得10個歌手，𠵱家多到變50個歌手，支持率係會被分散㗎，我都冇獎，點可以話商台自己人幫自己人呢？」
陪葬連詩雅：少少失望！
叱咤公信力到底有幾高？睇最後出爐我最喜愛的歌曲5強就知道。Kary首〈人非草木〉YouTube點擊得43萬，羅力威隻〈雙子情歌〉幾個版本加埋都唔夠50萬，反而贏咗網上點擊多佢哋10倍，過440萬連詩雅首YouTube金中金〈到此為止〉。主唱連詩雅都話失望。
信邊個好？
YouTube最Hit~入唔到5強係有少少失望嘅，不過首歌都入咗20強，算係同幫我作曲嘅師兄周柏豪有個交代囉！
