【今日我至奇】本來天氣咁凍包到冚真係唔會見到頸，不過愷威一轉頭就見到佢條頸大個咖喱雞印（紅圈示），真係離奇。CFP圖片
【上海虹橋機場】內地女星楊冪同劉愷威係少數公開承認拍拖嘅圈中人，佢哋從來都唔介意喺人前晒恩愛，前排愷威去無錫拍劇集《江南四大才子》，經常同男友各有各忙聚少離多嘅楊冪，特登走去探愷威班，仲唔避忌咁公開攬攬啜啜，真係愛得好纏綿。
現年38歲嘅愷威成日都話好想同細佢12年嘅楊冪結婚，之前送埋三千萬豪宅畀女友，又將女友個名加埋入自己公司做董事，分身家冧爆楊冪。
十指緊扣現身
前日元旦日，愷威同楊冪現身上海虹橋機場，原來呢個廿四孝男友親自送女友去上海開工，戴住黑超嘅愷威同楊冪依然表現親密，十指緊扣任影唔嬲，仲好有禮貌咁同記者講新年快樂，又細心問候大家凍唔凍，不過就無意中俾記者發現愷威條頸右邊有「咖喱雞」痕迹，佢哋兩個一向愛得癡纏又大方，有咖喱雞都可以話係理所當然嘅事，唔使太驚訝。
From:
http://hk.apple.nextmedia ... 130103/18121170
