歌手G.E.M.（鄧紫棋）繼日前暗寸「叱咤頒獎禮」不公後，昨日更火上加油上載一條疑似鬧爆「叱咤」的短片，其經理人插爆頒獎禮搞小圈子，而鄭融和關心妍同樣稱缺席頒獎禮，有候選歌的她倆卻自稱是「無入圍歌曲」，似砌詞no show作無聲抗議，再惹起杯葛「叱咤」之嫌！
G.E.M.拍片暗寸「叱咤頒獎禮」誤導緊觀眾。
G.E.M.早前在新城的頒獎禮獲勁爆女歌手獎。
G.E.M.繼日前暗寸叱咤機制模糊，發表「唔識高層」言論後，條氣唔順的她昨日更自拍一條短片公然「玩嘢」轟頒獎禮無公信力：「你想做一個一年度嘅event冇問題，但一定要be true to yourself！」又稱：「你言行唔一致嘅時候，我唔知應該要尊重邊一樣先啱，因為你係誤導緊觀眾！」雖然沒有指名道姓，但短片中穿插「叱咤頒獎禮」的舊片段，其經理人張丹受訪時直插：「唔係冇獎發爛渣，但你成日話以公平名義去搞小圈子遊戲會影響到香港娛樂圈，再咁會搞死香港樂壇！」他又稱不怕電台秋後算帳，強調只是針對頒獎禮。
聽日開P
另外，鄭融和陳奐仁昨日以評判身份出席「Neway新星秀大賽」歌唱比賽，鄭融自爆明日會和男友及朋友開party慶祝，問到豈非缺席「叱咤頒獎禮」時，她就尷尬地解釋因今年無入圍歌，所以不會出席，同時暗寸電台機制：「好關係一定要有，想要好成績係要多勞多得，平時要多啲做嘢。（今年做得少？）因為今年公司人事變動。（怕唔怕電台唔高興？）唔關事，冇歌唔去好正常啫！」
鄭融解釋因今年無入圍歌才缺席「叱咤頒獎禮」。
同公司的關心妍亦透過WhatsApp回覆：「我全年冇任何歌入榜所以公司話唔使去！」不過據知唱片公司就只派組合HotCha做代表，成員Winkie受訪時表示：「有冇歌入我就唔知，冇獎都會去頒獎禮，要有體育精神！」
心情靚爆的祖兒（左）昨日和洪杰同遊新加坡。
口供矛盾
其公司星娛樂唱片部總經理郭先生承認鄭融、關心妍和HotCha都有歌曲入圍：「只係鄭融有工作，關心妍唔喺香港所以去唔到。（怕畀人話杯葛？）唔會，每個電台有自己機制，頒獎禮一定有得有失，唔會冇獎就唔去，我哋旗下嘅歌手會繼續努力。」眾人口供非常矛盾。另外，容祖兒昨日和師弟洪杰同遊新加坡的主題樂園，預料再成「叱咤」女歌手大贏家的她心情靚爆！
From:
http://orientaldaily.on.c ... /00282_015.html
