杜汶澤踏入40之年腦筋急轉彎，明年不但破除人多恐懼開處男talk show，還投資搞電影公司獨沽一味拍港產片，阿澤心底這團火，就是被成功以刀仔鋸大樹的電影《低俗喜劇》燃燒起來，令阿澤拒絕再受內地審批劇本束縛，的起心肝捍衞本土文化創作，還呼籲一線紅星減片酬撐港片，揚言已經受夠了的阿澤爆粗洩憤：「我公司能夠過到內地審批嘅戲，都好X難。」
撰文：余燕儀
生活在鏡頭下十多年的杜汶澤，觀眾就是他的米飯班主，但阿澤竟然會害怕人多。當初太陽娛樂老闆搵阿澤做talk show時，被他一口拒絕：「我怕人多，成世仔都唔做登台又怕記嘢。」後來對方投資拍港產片《低俗喜劇》，在商業上得到好成績，阿澤才知自己錯了：「杜汶澤一條咔拉蘇，有乜可能有3,000萬票房，證明觀眾需要笑，尤其家社會氣氛好差，經濟、政治都俾人牽住鼻子走，我作為土生土長香港人，想透過talk show同港人加油。」
阿澤的talk show以成長經歷做內容，曾在麗晶酒店扒房做侍應的他鬼馬說：「嗰時見過梁朝偉同劉嘉玲嚟食飯，又見過萬梓良飲醉酒，仲第一次見到吳君如，心諗點解呢個女人咁肥，男友杜德偉咁靚仔，哈哈！以前我係侍應，佢哋冇避忌，我會將佢哋最真實一面講出嚟，呢啲都係talk show好題材，當然唔少得自己嘅江湖路、ATV做咖喱啡，最重要純粹搞笑。」
杜汶澤眼見社會氣氛差，決定搞talk show為港人加油。杜汶澤再加一隻騾，打造港產片《低俗喜劇》，為港人減壓。
杜汶澤（左）當年參演亞視劇集《我和殭屍有個約會II》，開始多人認識。去年為《DIVA》做監製，杜汶澤坦言好多橋段因內地審批而扭曲。
內地扭曲橋段
港產片《低俗喜劇》的成功，令阿澤豁然開朗找到正確方向，他說：「睇《低俗》票房就知香港人受夠，我哋返大陸做嘢，有時遇不公平對待喺網上呻吓，就會俾網友圍剿：『你咁巴閉，唔好上嚟大陸搵食吖笨。』我就做一次畀你睇，你話我有冇本事長期唔靠大陸搵食？坦白講我冇本事，但偶然整一鑊你嘆吓，唔好以為我流流哋，talk show係《低俗》之後，我決定破除自己恐懼去做，我要推戲做準備，犧牲比talk show高嘅片酬，所以好敬佩黃秋生咁高片酬演員去做舞台劇。」
《低俗喜劇》之後，有電影公司改變策略，支持導演拍港產片，明年阿澤更開公司打正旗號拍港產片，他說：「有時搵少啲要為觀眾做吓嘢，大家都係香港人，尤其做電影呢行，為咗人民幣放棄香港觀眾，擺明唔係拍畀你睇，所以下年我諗住開電影公司，專做本地嘅戲，絕對唔考慮內地市場，原因係創作自由，捍衛本土文化，自己做監製，製作啲冇大陸投資，香港都有人睇嘅戲，例如黑幫片、性工作者驚慄片，我受夠啦，好似去年做《DIVA》監製，好多橋段因為內地審批被扭曲，做咗呢行咁多年，監製咗四部戲，想嘗試點樣經營電影，我公司能夠過到內地審批嘅戲，都好X難，我同導演聯絡咗，邊部劇本過唔到內地，即刻攞嚟。」
與吳君如相識多年，杜汶澤開talk show實行出賣朋友。黃秋生貴為高片酬演員仍選擇做舞台劇，令杜汶澤十分敬佩。
片酬收漫遊價
阿澤對於導演跟風拍港產片，他拍掌叫好：「以前反對電影圈跟風，但今次覺得係好事，香港人有自己地道文化，唔可以回歸後冇咗，香港人成功嚟自百厭、反叛，創意就係咁嚟，如果對香港市場有信心，大家至跟風啫。」不過，一線演員片酬達七位數，冇內地市場做靠山的港產片，怎有能力搵紅星撐場？阿澤說：「所以我有中港兩邊價，同漫遊一樣，平時拍大陸戲收漫遊價，儲夠糧就拍部收平啲，演員好接近性工作者，接咗幾個有臭狐、肥佬衰客，間中有個靚仔，唔收錢都做，香港電影再係咁會死，我同好多演員傾過呢個問題，大家都餓好劇本，我希望演員用本地價幫我拍，尤其女演員，近年俾大陸女演員搶晒飯碗，喺合拍制度冇嘢撈。」
王晶的《古惑仔：江湖新秩序》雖以港產片掛帥，卻搵內地女星童菲做細細粒，似乎掛羊頭賣狗肉？阿澤抵死說：「晶哥每個年代有佢喜歡女演員，堅持自己品味，我講到咁白，都差唔多啩，哈哈！我同佢咁好朋友，尊重佢私底下品味，我覺得觀眾有權選擇。
From:
http://hk.apple.nextmedia ... 121229/18116590
