因男藝人裸照案「成名」的劉定成，今年6月非禮及恐嚇罪成被判監十七個月，四個月後獲准上訴保釋外出。獄中生活令他暴瘦40磅，滿頭白髮樣子憔悴。
劉公子重獲自由當然要盡情享受。上周四（6日）精神奕奕的他在跑馬地餐廳鋸扒，食飽後不改其獵男本性，走到附近公廁，與一名中年男子搭訕。
發現鏡頭後，劉公子主動聯絡本刊男記者。出冊後首次接受訪問的他，提到最「欣賞」的羅仲謙時嘆息說：「我唔會再掂羅仲謙，佢都有楊怡咯！」今年聖誕，劉公子揚言會開派對，以前關係密切嘅一班港男，唔知有冇膽現身呢？
雨中搭訕
行到去跑馬地公廁門口，劉公子遇上一名中年男子，兩人站在公廁門口吹水。雨愈落愈大，一把雨傘兩份用繼續傾，傾足十分鐘。
摸手仔
劉公子與中年男子十分投契，傾到興起時兩人突然摸手仔同揩面珠（下圖）。不過中年男子唔係後生靚仔，加上街坊短褲look，應該唔係劉公子杯茶。之後發現鏡頭，劉公子即閃。
單拖現身
上周四（6日），出冊後鮮有現身的劉定成，用膳後到超市入貨，買了一些日用品。現場所見，劉公子髮型梳得整整齊齊，身形睇落肥番至少十幾磅。身邊已無契仔傍住的他，頓感孤獨。
揩面珠
62歲富家公子劉定成，坐足四個多月監，10月中終於「出冊」，可以重返人間，繼續吃喝玩樂。由於保釋期間不能出境，他惟有留港嘆世界。早前暴瘦的劉公子現已增磅不少，比起出冊時的「白髮長者look」精神得多。
劉公子口口聲聲同羅仲謙割席，但一直有留意謙謙的新聞，好似早前楊怡在謙謙座駕內嘔吐，嘔在雲吞麵的事件，劉公子在訪問中亦有提及。
獨自開餐
上周四（6日），劉公子步出跑馬地寓所。明顯經過悉心打扮的他，獨自到跑馬地一間扒房用膳，然後到隔籬街的公廁門口，與一名中年男子搭訕，兩人有講有笑。由於當時下着毛毛雨，劉公子索性為中年男子擔遮，在傘下慢慢傾。兩人雖然好傾，但機警的劉公子很快便發現鏡頭，劉公子最終獨個返家。
今年5月入冊前風騷
未入冊的劉公子身形健碩。各大傳媒派出清一色全男班記者採訪，每次劉公子被訪追，都顯得樂在其中。
今年10月暴瘦出冊
10月中，劉公子保釋外出，瘦了兩個碼。雖戴上黑超及一身潮人打扮，仍難掩蒼老。滿頭白髮的他在囚車中刻意迴避鏡頭，獄中生涯一定苦不堪言。
契仔人間蒸發
劉公子契仔盧昕傑犯案時年僅23歲，而且肯認罪，案中亦未有涉及暴力或黑社會因素，法庭輕判契仔接受240小時社會服務令。不過劉公子4個多月牢獄生涯中，契仔冇探過監，潛咗水。
諷楊怡食雲吞麵
同日本刊男記者收到劉公子來電，出冊後一直保持緘默的他，風騷作風似乎返晒嚟。
記：劉公子，出番嚟呢兩個月生活如何？
劉：好開心，多謝關心。
記：今日見你喺公廁門口同個中年男人搭訕喎？
劉：你唔好又寫我四圍溝仔喎！我哋係朋友，見到面吹下水啫！
記：仲有冇同羅仲謙聯絡？
劉：哎呀！我唔會再掂佢，佢都有楊怡咯！總之佢有佢哋食雲吞麵，我食自己得㗎喇！（他果然有留意羅仲謙的新聞。）
記：你會唔會嬲楊怡？
劉：我鍾意佢都嚟唔切啦！仲會投佢做「最佳女主角」。
記：咁其他港男呢？佢哋仲有冇搵你？
劉：佢哋冇良心，靚仔大隻又點吖！（突然停頓，覺得講多咗。）你唔好訪問我啦！我唔想再講佢哋，你去問曾志偉同黃乜（黃浩）好過啦！佢哋打交仲好睇。我有乜好睇呢？老坑一個，你搵林峯同黃宗澤啦！
記：想約你做個專訪，影靚相可以嗎？
劉：我有咩好影喎！影我裸照好唔好？你驚唔驚先？唔同你講啦，總之聖誕快樂，新年進步。Bye bye！
令劉公子又愛又恨的羅仲謙，就透過經理人回應說：「佢嘅嘢我唔再講，都係嗰句冇回應啦！」謙謙咁冷漠，難怪劉公子對佢心死。雖然與一眾大隻港男割席，但劉公子絕不會讓自己寂寞過聖誕，據知他已籌備好一個全男班聖誕同歡派對，地點在銅鑼灣一私竇。知情者透露：「劉公子透過中間人搵咗十幾個猛男到會。佢仲要求個個好似A&F男model咁fit嘅身形，一次過搵咁多仔仔真係前所未有。」對於身家過億的劉公子，花錢搞個聖誕派對都係濕濕碎。
港男避之則吉
劉定成案因涉及圈中多名男藝人，無綫港男亦榜上有名。如今劉公子出冊，唔少港男為求自保都與他劃清界線，被劉公子指無良心。
