今年於香港大學修畢牙醫學士課程的許廷鏗，原來已經靜靜雞掛牌做牙醫。
許廷鏗家族來頭不小，一心望子成龍的許父，原來不太贊成兒子入娛樂圈，所以為兒子鋪好路，安排他在叔父的牙醫診所掛牌。而許廷鏗亦與父親達成協議，寧願辛苦打兩份工，都不會放棄做歌手，還自資租了一間band房作歌，轉型做唱作人，希望威畀屋企人睇！
許廷鏗父親做貿易生意，家境富裕，除了阿哥係律師，仲有個醫生家姐，一屋專業人士，好彩許廷鏗入行後冇捨棄專業，順利完成牙醫學士課程正式掛牌做牙醫。今月初，本刊發現許廷鏗一早便去到九龍某舊區一間牙醫診所開工，入到去先同護士打晒招呼，之後便戴上口罩和穿上手術袍，入房準備幫客人洗牙，開工至傍晚6時，許廷鏗即變身歌手，趕到髮型屋，再趕赴晚上的活動。
今日有幾多booking？真實對白
為免客人認出，許廷鏗一返到診所就戴上口罩。Alfred隨即向護士查詢當日booking，相當專業。
許廷鏗一早就返診所開工，當日佢着住套老西，似番個專業人士多過歌星。
一返到診所，Alfred即純熟地着上醫生袍，牙醫款出晒嚟。據知該診所主要做街坊生意，所以唔係咁多顧客認得Alfred係歌星。
老豆唔畀做歌星
據知，許父不太贊成兒子在娛樂圈發展，但許廷鏗堅持出碟，更跟家人約法三章，做牙醫同時兼顧做歌手。知情人士說︰「上次公園飲醉酒單新聞，真係嚇親Alfred老豆，唔想自己個仔成日俾狗仔隊跟，不過Alfred好硬頸，寧願辛苦啲，都要繼續出碟，好彩佢隻碟賣得幾好，先氹掂佢老豆。而且Alfred講明唔使屋企錢，做牙醫初初月入都有4萬幾，加埋廣告同活動收入，𠵱家畀番家用都仲得。」
做足6粒鐘
雖然診所唔算大規模，但位於屋邨多街坊幫襯，Alfred出出入入做唔停手。
6點幾收工，Alfred即飛車去髮型屋整頭，趕8點出席新城活動，演出之後就直去中環band房，唔怪得老闆Herman同老豆都咁放心。
前排許廷鏗在微博話自己身在練歌勝地，呢間就係佢租嘅中環band房。
「洗牙唱兩句你聽！」
最近轉型唱作人的許廷鏗，更於中環自資租了一間band房，朝早做牙醫、夜晚就返band房作歌，老豆當然冇聲出。
本刊在活動上問Alfred是否已正式掛牌，他說︰「啱啱返工，唔想影響到診所同事和屋企人！（診所主診醫生都是姓許，聽聞係你親阿叔？）係……親戚，其實我都正式掛牌，𠵱家打兩份工好辛苦㗎，但會好好安排時間，最近開始寫歌，你嚟洗牙咪唱兩句畀你聽囉！」
疊水家族
今年許廷鏗為無綫返汕頭拍《回鄉》，去到許家祠堂，已知道許氏家族來頭勁，許廷鏗父親是「香港腎臟基金會」副主席許義鏞，熱心公益之餘，據聞許父母96年開始炒樓炒工廈，現在持有至少5個物業，市值超過8千萬。而且許家專出專業人士，許廷鏗的哥哥是律師、而其中一位姐姐就是醫生，仲有一位家姐係銀行家。
許父眼光獨到，做生意和炒樓都有一手，當然望子成龍，幫許廷鏗鋪定路。Alfred就算以後唔做歌手，做牙醫都一樣搵到錢。之前許廷鏗返汕頭拍特輯，仲公開埋族譜，佢同阿哥永鏗兩兄弟由細到大都名列前茅。
許家祠堂似個小城堡，單睇已知佢家族有番咁上下。
