做咗人老豆嘅阿Paul黃貫中，為咗搵奶粉錢周身唔得閒，除咗之前孖住羅仲謙梁烈唯拍新版《古惑仔》，密密登台做騷更加唔少得。
工作人員手忙腳亂搬行李，阿Paul落到街第一件事：點煙！同親細佬黃貫其一齊夾band搵錢，阿Paul一邊扯煙，一邊同細佬（箭嘴）吹水。
上個禮拜四（六日）下午，《壹》仔响九龍城見到阿Paul同佢隊The Postman嘅成員兼細佬黃貫其，一齊响屋企樓下搬行李上車，當中包括大支細支結他。
兩架車都掛有中港車牌，原來佢哋成班人準備去深圳，為一個搖滾音樂會演出。做騷搵錢，阿Paul暫時唔可以湊囡囡，不過都有個好處，就係一落到街，可以自由歎煙。對住朱茵兩母女，冇得煙駁煙啫！
為咗方便家人幫手照顧朱茵兩母女，阿Paul一家三口暫時繼續住响九龍城，所以要耐不耐返入大埔舊居，睇吓佢幾隻藏獒。
撰文：八珍
