梁烈唯首次飾演皇帝角色，便要跟好戲之人米雪、陳國邦、黎耀祥等合作，坦言起初甚感壓力，幸拍攝時在眾人「戲」氛感染下很快便能投入角色，又笑言自己的baby face跟年紀輕輕的同治十分匹配，有助他更入戲。
今年有五套劇出街的梁烈唯，成績甚佳。梁烈唯樣子baby face，不過都能演成熟的型男。
無綫藝人梁烈唯（唯唯）今年成績不俗，先後有《耀舞長安》、《飛虎》、《大太監》、《缺宅男女》及《東西宮略》五部劇集出街，而《缺宅男女》中的懦弱小男人關二哥及《大太監》中的同治兩角，唯唯坦言最考演技。他表示：「因為呢兩個角色嘅起伏比較大，同治呢個皇帝簡直係人生嘅濃縮版，由佢14歲做到19歲，當中分別要明顯得嚟又唔可以太做作，至於關二哥個角色情緒變化好大，但起碼係時裝戲，好多嘢我可能會經歷過，但同治呢個角色一定無法經歷，要靠睇歷史書去深入了解。」
實景助入戲
唯唯第一次飾演皇帝角色，他坦言監製羅永賢有向他提過，要搵個可以做到戲而又似14歲的皇帝實在很難，唯唯笑言：「個天對我幾好，個樣仲好baby face！」他又表示很榮幸可以演出同治這個角色，因為除了於三級片中有提過同治外，都沒甚電影、電視劇有人演過這角，他坦言：「我都做咗好多資料搜集，睇咗啲野史同正史去揣摩角色，之前冇乜人演過同治反而好，唔會先入為主，我都想做到大家諗起同治就諗起我。」
梁烈唯於《大太監》中跟好戲之人合作，獲益良多。
提到該劇於橫店拍攝，他表示整個感覺都不同：「我記得郭晉安同我講過，如果實景拍攝會更加投入，喺紫禁城大殿望落去，全部文武百官喺晒度，嗰種氣勢感覺真係好正。」唯唯又表示初時接拍都甚有壓力，皆因劇中甚多好戲之人：「加上拍咗冇耐佢哋就話飾演同治嗰位小朋友演得好好，我好驚會比下去，不過米雪、陳國邦、黎耀祥佢哋都好幫我，當中有場我同額娘米雪的感情戲，我只係望佢一個眼神，已經嚟料，自己都唔使點樣培養感情，望見佢哋已經自然入戲。」
