■舒淇噚日獲贈由扭計骰整出嚟嘅肖像，佢自爆話會搞末日派對，仲一定預埋馮德倫（小圖）。
舒淇噚日去澳門出席一個聖誕揭幕禮，主辦商搵咗健力士世界紀錄保持者Josh Chalom，以超過80,000個扭計骰砌咗一幅長達67米嘅馬賽克畫，用嚟挑戰新嘅世界紀錄，另外再用幾千個扭計骰整咗幅舒淇肖像送畀舒淇，呢份驚喜令佢喜出望外。
避談舊愛黎明舒淇講起有預言話今個月嘅21號世界末日，佢話會先同屋企人食飯，之後就搞大型派對，問會唔會搵埋緋聞男友馮德倫一齊過？佢大方咁話：「都有，不嬲聖誕同新年都會聚。」問佢會唔會過咗末日後就承認自己拍拖？佢話：「好奇怪，個個覺得我拍拖，但就算有都唔會同大家講。」
提起剛啱離婚嘅黎明，舒淇就好避忌話：「人哋嘢唔討論太多。」對於好友曾志偉惹麻煩，舒淇都有留意：「家呢個世界發生好多奇怪事，啲人行為都好奇怪。」
