養尊處優嘅林嘉欣，最近因老友Eason先肯出山拍MV，FBI聽聞嘉欣生完之後，唔少導演都想搵佢拍戲，但嘉欣復出第一擊，講明要參展戲先拍！
雖然嘉欣仲係少少肥，但皮膚真係又白又滑，唔係個個女星都夠膽素顏見人㗎！
上週二（27日），深居簡出嘅嘉欣竟然喺銅鑼灣現身，當日佢去咗銅鑼灣一間花店買花。雖然女女Kayla已經2歲，34歲嘅嘉欣，素顏仍然見得人，佢揀咗20分鐘，嘉欣只係買咗個盆栽仔，走嗰陣見到FBI，仲笑晒口揮晒手，得閒情願種花都唔拍戲，呢啲咪有style囉。
老公錫晒
10年，同導演袁劍偉喺加拿大註冊結婚，同年10月，嘉欣生咗女兒Kayla，從此暫別娛樂圈。
嘉欣肯出山，其實佢老公袁劍偉都出唔少力。前排Eason同袁劍偉分享新歌〈信任〉，袁劍偉拍心口話做導演，寫好劇本之後，就提議老婆做女主角。
嘉欣同Eason因拍《戀人絮語》成為好友，今次可以算係再續前緣。拍MV要化「行」妝，嘉欣仍相當有星味，唔怪得唔少導演都打佢主意啦！
唔知係咪近得多Eason，嘉欣吹水嘅功力都唔弱，同售貨員傾到唔願走。見到FBI，嘉欣好主動咁打招呼，當年就係呢個招牌笑容冧死唔少宅男。
