■陳偉成隊波贏咗，唔怪得佢忍唔住雙手攬實娜姐，鬼咁肉緊。
■陳偉成攞起娜姐設計、印有周秀娜嘅球衣，冧得娜姐開心送吻。
方力申、張繼聰、周秀娜同男友陳偉成（Avis）及何佩瑜（Jeana）等，前晚到灣仔參加籃球比賽，同場有無綫藝員組成明星邀請隊出戰表演賽，傳緋聞嘅陳庭欣同翟威廉前後腳到場。Avis等組成DJ聯盟對嶺南大學爭季軍，結果以48比43險勝，小方同張繼聰嘅Nuts就對城大爭冠軍，經過激戰後Nuts以70比67勝出。
Mia識做避席娜姐同Jeana等人為Avis打氣，原來娜姐係突擊出現，嚟到就唔避忌同Avis攬攬同擊掌，sweet到爆，Avis話：「唔知佢會嚟，突然見個咁矮嘅女仔先發覺。」娜姐就話：「我身為球衣設計師，又未睇過佢哋着上身，所以嚟睇吓。」係咪一早知男友好波？向Avis送吻嘅娜姐借機讚自己又讚男友：「我唔知，我只係知周秀娜好波。」娜姐好波係人都知，咁Avis件球衣印有周秀娜，擺明讚埋男友一份。
原本陳靜儀（Mia）亦到場，但最後唔見，咁啱Mia同Avis又傳過緋聞，係咪因娜姐出現佢唔敢嚟？娜姐話：「冇嘢喎，冇所謂，最緊要好波。」除娜姐撐Avis外，謝安琪都嚟撐張繼聰，佢讚小方係神射手，小方自嘲話：「我怕拉高球員平均年紀咋！」
