大熱視后徐子珊為台慶夜試鑽飾，自言向來走實際路線，從不自資買鑽石，亦不敢亂收，揚言異性當中僅接納未來老公求婚時送，奈何這位Mr.Right尚在尋覓中，而對於網上為視后戰開盤口，子珊笑指會呼籲身邊朋友下注！
有說鑽石是女士們的恩物，雖然子珊深明箇中道理，但30多年來除了當選港姐時的后冠外，從未一嘗擁有以卡作鑽石單位的經驗，不過為了本月19日舉行的台慶夜，子珊準備閃令令現身，日前更專程到珠寶店揀鑽飾，期間選中一套價值逾一百萬港幣的鑽飾，笑言心情分外緊張。
子珊透露從小於母親教導下，若然有充裕銀彈時，置業絕對是首選，她謂：「買樓可以保值嘛！我份人比較實際，保險箱最貴重就係港姐個后冠，價值百幾萬，鑽石我從來唔會買畀自己，等緊將來老公送囉！（鑽石戒指都冇？）碎鑽媽咪有送，同埋每年台慶都有機會戴（冇男仔送過？）冇收過，亦唔敢亂收，都係等人求婚先收啦！不過話時話，呢啲驚喜又唔可以太多次，1次就夠，否則會麻木o架！」談到台慶當晚服飾，子珊表示今次與以往不一樣，會走高貴路線。
叫朋友落注
談到於新劇《雷霆掃毒》受好評，隨後更成為視后大熱，早前網上視后選舉票數更勝競敵楊怡，近日有網友開出視后賭盤，她的賠率乃一賠二，對此子珊笑謂：「咁似跑馬嘅，幾funny，好開心有各方面認同，不過暫時都係平常心（會唔會落注？）唔會啦！但會叫朋友買囉！哈哈！」
而近日內地網站列出近年十大最受歡迎劇集搜索，子珊有份演出的《法證先鋒Ⅲ》、《潛行狙擊》及《雷霆掃毒》被列入頭三甲，笑言對此感榮幸，寄望藉此打入內地市場，接更多內地有關的工作，好讓其為再次置業儲足銀彈。
前港姐朱晨麗首部參與的劇集《名媛望族》最近播出，透露起初抱住玩的心態面試，沒料最終被選中，笑言拍攝時大感壓力，她謂：「因為個角色都幾重戲份，又飛紙仔（廣東話唔係咁叻，唸對白係咪好辛苦？）係好緊張，好在身邊有前輩鼓勵我，好似劉松仁、吳卓羲、馬國明，佢哋叫我放鬆啲。」朱晨麗坦言有看回自己演出片段，認為仍有不少改善空間，尤其感情及內心戲份有待改進。
揀鑽飾備戰的朱晨麗務求在台慶當晚搶鏡。
而於本月19日舉行的台慶，朱晨麗表示屆時會打扮靚靚現身，日前更往六福珠寶揀鑽飾，期間試戴一套價值一百萬元的鑽飾，笑言除了選港姐時戴過三百多萬后冠外，從未戴過如此貴重鑽飾，她謂：「成層樓首期咁貴，我暫時未買得起，但等我有錢的話第一粒要買畀媽咪先！」
