雖然洪永城成日扮單身，但記者亦在Emily的facebook中發現唔少佢同洪永城嘅拍拖照。據知Emily港大畢業，學歷比洪永城好，上年二人仲齊齊去咗北海道旅行。
自余詠珊由有線電視跳槽無綫，出任無綫非戲劇科製作總監後，一眾曾經喺有線跟過佢搵食嘅舊部亦相繼跟隊，黃翠如拍劇做女一、陸浩明又開始喺J2紮根，但要數最得寵的，係由now過檔、專門主持旅遊節目的洪永城。洪永城一入無綫即安排主持台慶黃金時段旅遊節目《走過烽火大地》，年底更會拍劇做主角。
幕前洪永城係旅遊王子，但背後原來係溝女王。據知，洪原本跟任職金融界嘅圈外女友拍拖多年，最近卻因多次被揭發背住女友溝女而致分手收場，洪的密友更形容佢對外形唔差嘅女性都會即刻起痰，名副其實鹹濕仔。
30歲洪永城（Tony）有線出道，08年轉投now，今年因余詠珊關係轉投無綫，即被安排拍攝台慶重頭節旅遊目《走過烽火大地》，得寵程度可見一斑。據知12月底洪永城更會同陳茵媺、林夏薇拍攝新劇《單戀雙城》。
同裸女爆房
09年洪永城為now到西班牙拍攝旅遊節目《一個地球》，介紹畢加索名作，洪永城應導演要求全裸上陣扮畢加索名畫造型，更同外籍model肉搏。做旅遊節目都要全裸上陣，認真搏命。
扮單身溝女
做過3間電視台都係旅遊主持，洪永城係正宗旅遊王子。雖然洪永城唔算特別靚仔，但憑陽光男孩外表，加上口齒伶俐又玩得，身邊一直不乏女性朋友。
Tony的身邊人透露，他最近同拍拖多年的女友Emily分手，原因就係衰花心。「佢同Emily拍咗好耐拖，經常都會孖住出去夜蒲，佢哋都有一班共同嘅朋友。
不過Tony份人就好鍾意撩女仔，身邊亦有好多異性，佢試過多次背住自己女友約會異性，仲同對方講自己冇女朋友，即使對方結咗婚，佢都會纏實對方，食得唔好嘥。」
Emily（右）身邊好友同洪永城相熟，所以拍拖期間經常一大班朋友一齊夜蒲，齋睇洪永城呢個伸脷樣就知佢玩得。洪永城同Emily拍拖4年，上年暑假Emily仲上載同洪永城去沙灘玩嘅煙韌相上facebook，可惜今年就因男友花心而分手。
提黄婉曼興奮
11年拍攝now《食勻全中國》又全裸上陣，介紹洛陽嘅浴堂。
因為衰溝女，洪永城女友Emily於是主動提分手。事實上洪永城亦不是第一次衰花心激嬲女友。
今年初，他與「32F」黄婉曼因為主持now節目《撳錢》而傳撻着，Emily亦曾大興問罪，不過最後亦被口甜舌滑的洪永城氹掂冇事。之不過洪永城夜蒲時，曾與新相識嘅女性朋友打開話題，亦會提起黄婉曼，「佢提起黄婉曼就好開心，當時佢同黄傳緊緋聞，佢就話對方冇男友囉。而當時佢同女朋友即使一齊出去蒲都各有各玩，開始冇乜交流，都估佢哋唔拍得幾耐。」
本刊曾致電洪永城，但洪因身在英國工作，至截稿前仍未聯絡得上。
黄婉曼：唔會吼佢囉！
洪永城雖有固定女友，但對身邊女性都超嗒糖。據知做有線期間就對黃翠如有興趣，而喺now做主持時，亦傳過佢力追F cup黃婉曼。
《撳錢》撻着
洪永城喺now期間同黃婉曼經常主持《撳錢》，有傳洪永城力追，不過黃婉曼當時就爆洪永城有固定女友。記者週一致電黄婉曼，提起緋聞，她就說：「我當佢細佬嚟㗎咋，唔會吼佢囉，不過佢都冇追我。」
傳聞洪永城自05年認識黃翠如後便想力溝，可惜女方唔過電，最近二人都加入無綫，更一齊到英國拍攝旅遊節目，黃翠如更上載二人合照，但就寫住「兄弟」，週一黄翠如表示：「我當佢好兄弟，我知佢啱啱散咗，但理由你問番佢啦！」
我當佢好兄弟。（真實對白）
主持變男一
TVB花旦小生買少見少，加上有余詠珊提攜，洪永城於今年年尾會正式由主持跳到拍劇，零拍劇經驗竟升呢做男主角。
收視高過《男主角》
洪永城一加盟無綫即被派去拍攝《走過烽火大地》，仲喺台慶月檔期播，有余詠珊（小圖）撐住係唔同啲。首週平均收24，最高更有27，仲高過《最佳男主角》2點添。洪永城拍完新旅遊節目後，12月底將會拍攝劇集《單戀雙城》，劇中有陳茵媺同林夏薇，他處女拍劇竟空降做男一。
家道中落
洪永城於家中排第二，屋企曾經富貴過，住過羅便臣道，亦有Benz出入，洪亦被家人送到新西蘭留學。不過家境突然喺02年變差，洪永城回港工作。09年成27歲，才透過HKU SPACE完成澳洲Curtin University嘅學位課程，更喺灣仔君悅酒店行畢業禮，媽媽、兄長及女友都有撐場支持。
採訪、撰文：娛樂組
