星期日（十一月十一日）光棍節，五十歲杜德偉專登揀呢日做老襯，迎娶二十六歲攝影師女友Ice Lee。同外父同年，外母細佢一年，杜德偉娶嫩妻表明有心有力，打算過多兩年二人世界先進行生仔大計。
配合一對新人嘅懷舊婚禮主題，江欣燕扮柯德莉夏萍同公老吳積遜嚟飲，著到幾高貴都冇用，人出酒、你出命，醉到爆粗好失禮。
終於成家立室，杜德偉更組成十一人星級兄弟團，當中以處男下海第一次做兄弟嘅梁朝偉最受班姊妹們歡迎，去到粉嶺接新娘，偉仔仲變咗人肉布景版，俾班村民捉住影合照。
接完新娘，一眾親友去到深灣遊艇會進行註冊兼擺酒，兄弟團星光熠熠，夜晚嚟飲嘅賓客同樣夠分量，包括成龍大哥、劉嘉玲、梁家輝、張學友等等。
呢類場合，飲多兩杯在所難免，但飲到好似江欣燕咁斷片兼爆粗，由老公吳積遜扶上車沿路粗口橫飛：「影影影，影你老×咩，×你老×，企都企唔到！」另一邊廂，劈慣飲慣嘅上山詩納，可能比較多爛醉俾人影相嘅經驗，只係飲到腳仔軟要人扶上車，著住四吋高踭鞋，冇仆低出醜有驚無險。
有星級兄弟團助陣，戴住同齡外父送上金豬牌嘅杜德偉，話接新娘時暢通無阻。
朝早去粉嶺接新娘，兄弟團之一嘅梁朝偉，俾附近班街坊捉住影相，連呂方都成為師奶們嘅合照目標。
上山詩納同樣醉到行貓步兼腳仔軟，好在有人扶一扶，否則仆落樓梯。
夜晚飲宴賓客星光熠熠，有梁家輝兩公婆、成龍以及張學友。
偉仔同B哥都係第一次做兄弟，夜晚各自帶埋另一半嚟飲喜酒。呢類場合例醉嘅曾志偉，居然仲識行識走，再同一對新人出門口同記者做訪問，奇跡。
