我們眼中的李玟，很super star，本是同根生香港人，新秀奪亞，台灣揚名，一口流利英語講到「咯咯聲」，再去美國出唱片——成功衝出亞洲第一步；最後，一首中文歌hit中老外耳仔，奧斯卡獻唱，名正言順取國際牌……
且慢，去年一個億元婚禮，一班美國熱門歌手贈興，她才真正算是由頭super到落腳趾尾。
李小姐成為尊貴闊太之後，沒馬上拎個愛馬仕去中環shopping嘆茶修甲做facial，反頻頻現身內地工作，有咁遠去到咁遠，跟名媛望族生活絕緣。
「我好獨立，唔需要靠老公。」個個都係咁講㗎啦！
幾醒目，CoCo見我面色，即說：「我係靠自己能力去照顧屋企人，開心好多。」
自己養自己唔難，養埋家人亦好啱數，然而，嫁得好嫁得威卻沒因利乘便繑埋雙手，咁至馨香，我不得不重新估量眼前呢一位細細粒但唔易招架的女強人。
Profile
CoCo Lee
原名：李美林
出生日期：1975年1月17日（山羊座）
出生地：香港（父為馬來西亞人、母為香港人）
身高：5呎3吋
體重：100磅
三圍：35-23-35
語言：廣東話、普通話、英語及法語。
學歷：美國加州大學爾灣分校生物系畢業
簡歷：93年，參加新秀，奪取亞軍。94年，往台灣發展，首推國語專輯。95年，首推英文唱片，展示美式唱腔，首月即大賣13萬張。99年，在美國出唱片，為跨出國際第一步。01年，憑《臥虎藏龍》主題曲《A Love Before Time》（中文名《月光愛人》），成為首位華人歌手為奧斯卡頒獎禮演唱。11年，跟利豐集團總裁Bruce Philip Rockowitz舉行億萬婚禮，成為一時佳話。
主要作品：《愛就要趁現在》（94）、《Brave Enough To Love》（95）、《Just No Other Way》（99）。
微博：
http://weibo.com/cocolee117
犧牲老公
前排CoCo跟fans聚會，眼見一位由十幾歲已跟住自己的粉絲，生了一胎，她逗人小孩玩之餘，望望自己，仲未有聲氣……「Oh my God！
「天意難催，結咗婚，梗想有BB，但呢啲唔係話生就可以即刻生，慢慢嚟；「好彩老公明白！」Bruce結過婚，已有兩女，當然跟老婆一樣唔急。
「我唔想放棄事業，惟有犧牲佢；「況且，咁至多話題大家傾嘛！」
只是，對我呢啲電視精來講，女人嫁入豪門，實係名媛望族一、二、三、四奶般，唔使工作，得閒約嚇好友傾嚇偈打嚇麻將買嚇衫，何解要這位億萬少婦繼續拼博？
「Why not？
「我好獨立，唔需要靠老公，靠自己照顧屋企人，開心好多。」幾口響，直情面帶光彩。
她還說，認識Bruce之前，自己已是工作狂，拍拖八年，大家經濟獨立，家陣，兼顧家庭之餘，還要返內地工作、錄新唱片、拍廣告，忙得不可開交，遲些做《中國好聲音》（浙江衞視主辦的真人秀歌唱節目）導師。
「我本身係唱歌比賽出身，好明白參賽者心態，希望以自己經驗幫到佢哋。
「另外，我打算開公司，呢個節目受歡迎，希望藉此揀選適合人選去做培訓。」
繼劉德華、黎明、梁詠琪做了老闆之後，CoCo也野心勃勃。
08年
Bruce 50歲生日，CoCo以女主人身份，帶住對方跟前妻所生的兩位女兒一同慶賀。《忽然1周》圖片
11年
結婚前，先在微博發放婚紗照，為1.5億世紀婚禮打頭陣。
婚姻唔係墳墓
一副女強人姿態，但請君別誤解，實情CoCo外剛內柔，在美國長大的她，為人爽快，卻不愛跟男人爭一日長短，對住老公，仲好溫柔。大抵港女最該放下身段問一問的問題，就如我問，點樣綁實男人心？
「做佢私人助理。」嚇？！
「拍拖八年，對方起居生活一向由我照顧，包括佢出門著乜衫，我幫佢諗好襯好，整整齊齊放好喺度，等佢試完，我再執埋入喼。
「依家，只要佢出一句聲，就算我喺房剪緊音樂，一樣放低所有事情，即刻走去搵佢。」
這也未算最細心，結婚剛一年，二人仍然如膠似漆，粉紅色情侶裝回到婚禮酒店慶祝，咪話唔sweet。「婚姻唔係戀愛墳墓，只有愈來愈好。
「Bruce成日話，好怕女人唔識照顧丈夫，事實上，我係做得比佢想像中更好。」
舉例說明，工時不穩的老公正在準備全球視像會議，時值香港時間凌晨2點，第二朝06開工的CoCo，捱住眼瞓，起身泡茶俾老公潤喉，「佢不停講嘢，我驚佢辛苦。」這才為之貼身兼貼心照顧。
「意見梗有唔同，但大家唔可以因為嘈交而隨便嗌分手，儘量大事化小。
「做夫妻，要花心思，更加唔可以冷落另一半。」係男人聽到都冧爆。
89年
9歲舉家移民三藩市，已是校內活躍份子，打波跳舞唱歌樣樣齊。
01年
自從在奧斯卡頒獎台上演唱，CoCo也愈來愈西化，從不吝嗇show性感本錢。《壹週刊》圖片
CoCo's tips
CoCo Lee
米白色絨軍帽$2,380
米白色茄士咩綴兔毛袖連身裙$11,880
both Max Mara
藍色頭紗stylist’s own
Q：點樣keep fit？
A：影相前，乜都唔食，水亦唔飲太多，平時，日日做一粒鐘瑜伽或排舞。
Q：自問是否購物狂？
A：我最鍾意買鞋，多到已經數唔到有幾多對，總之有個倉放鞋，最鍾意買platform。
好怕坐火車
CoCo Lee
黑色羊仔皮連腰帶連身裙$28,680 Sportmax
啡併黃色魚網絲襪stylist’s own
CoCo以李美林真名參選新秀，卻在台灣發跡，當時，公司細沒經費，專挑凌晨錄音，貪租最平，亦要靠自己一手搞掂化妝形象等，兼租車去電視台跑通告，18歲女，點頂？「我都未懂事，只係覺得台灣公司俾咗自己一個機會，冇理由放棄。」
終於，憑一首英文歌及新穎的唱腔打入樂壇，上位了，跑校園狂谷宣傳，有一趟，去台南做完騷，漏夜趕回台北，公司居然揀買最平車費的企位！CoCo一個女仔由凌晨12點企到第二朝8點，邊捉欄杆，邊拎住個化妝箱……「有個學生見到我，問朋友『係咪李玟？』好冇面呀！
「所以，我好怕坐火車，成世人，最記得嗰次罰企8個鐘。
「我哋呢一代歌手好辛苦，但係好事，依家新人，一出道擁有一切，變相冇咗做人態度。」
說到這裡，我終於明，Bruce點解揀中李玟做老婆，佢咪又係由網球教練捱到今日的集團總裁，二人做事心態一致，這才是維繫一段關係的基石。
