去年4月，「咖啡王子」陳豪與友人於馬來西亞一償心願開咖啡店，可惜不足一年即宣告玩完。不過陳豪未有灰心，本刊收到風他決心明年初在港捲土重來，今次「拍乸」是女友陳茵。男嘅煮咖啡，女嘅睇住盤數，一於夫妻檔上陣。
正在物色舖頭的陳豪，據知屬意中環擺花街地段，其中兩個分別屬於謝霆鋒及古巨基嘅靚舖亦有睇過，不過月租閒閒哋十幾廿萬。話晒都係同行，唔知有冇得商量呢？
自去年3月在深井碧堤半島秘築愛巢被踢爆戀情後，陳豪與陳茵媺（Aimee）同居已成為公開的秘密，不過二人一直對「同居」二字相當敏感。日前(1日)本刊直擊正在放假的陳豪與陳茵媺離開深井愛巢出街拍拖，本來sweet到痹的他們見到記者即尷尬傻笑，及後更駕車直駛將軍澳電視城作避風塘。
撞破過夜：上周四(1日)，本刊直擊陳豪與陳茵媺於深井愛巢瞓飽外出，女方戴上黑超仍難掩尷尬，之後更舉起V字手勢笑晒俾記者影相。執到陳豪呢個筍盤，係人都知你係勝利者啦！
攬女友手袋：好多男人都抗拒幫女友拎手袋，但陳豪連坐車都攬實陳茵媺個Chanel手袋，見俾記者影到，陳豪只有面紅紅咁強顏歡笑。
直駛電視城：正休假的陳豪，本來趁女友未開劇可以一齊出街拍拖，被本刊撞破後竟然直駛無綫電視城，不久陳茵媺就自己揸車走人，陳豪都咪話唔慘。
大佬「救駕」：被女友撇甩的陳豪即刻急call親生大佬揸車接他，再返回將軍澳寓所。其實佢同陳茵媺都公開戀情啦，出街拍拖好正常，唔使咁避忌喎。
二人公開戀情後以「情侶檔」出騷搵銀，更多次傳出婚訊，不過每次他們均笑笑口表示：「遲啲先！」查實陳豪一早已有全盤計劃，據知情人士透露：「陳豪都好想快啲娶Aimee過門，不過佢始終覺得男人要有一定程度嘅事業成就先夠穩重。舊年佢喺馬來西亞開咖啡店失敗，蝕咗一大筆錢，連帶結婚計劃都要延遲。」雖然在大馬的咖啡事業遇到挫折，但陳豪未有氣餒，更多次公開表示希望在港創業。
三個月前陳豪終拍板鐵定於下年在港開咖啡店。本刊收到消息，指他早前多次到尖沙嘴北京道一號及中環一帶睇舖，主攻中小型舖位，亦有睇過謝霆鋒與古巨基在中環擁有的地舖。陳豪亦趁最近放假，四出為舖頭尋找合適港人口味的咖啡豆，積極為開業籌謀，「佢覺得之前喺大馬間舖做唔住係因為自己唔可以親自打點，所以喺香港開舖會由入貨到沖咖啡都全程參與，依家仲研製緊一款口味獨特嘅咖啡做招牌咖啡，而財政大權就會交俾Aimee。Aimee都有入少少股，不過唔多囉！到生意上咗軌道之後，佢哋就會結婚。」知情者說。
霆鋒舖
市價約1億
月租約25萬
有新晉舖王之稱的霆鋒，在擺花街有五個舖位，圖中28號舖是今年5月英皇集團主席楊受成以9,120萬買入後再轉讓予霆鋒，單位連閣樓差不多有1,400呎。
古巨基舖
市價約6,000萬
月租約12萬
陳豪希望搵大概四、五百呎的中小型舖頭開店，而古巨基今年5月以5,400萬購入的擺花街22號地舖，面積有五百呎，舖位最近積極放租，無論地點同size都啱晒陳豪心水。
連鎖店偷師：早前陳豪與母親去中環shopping，之後再去Starbucks嘆咖啡。記者見陳豪在店內周圍，似乎是在偷師中，為自己開舖作好準備。
學炒豆：去年主持節目《品味咖啡》時，陳豪去過巴西、南非、法國等地拍外景，更於巴西跟當地人學炒咖啡豆。回港後他繼續鑽研，希望能為自己的咖啡店研發一杯獨特的咖啡。
明年減少拍劇
據知陳豪為求一圓自己的咖啡夢，今次不惜豪擲500萬，日前記者致電陳豪，他大方承認：「依家係睇緊幾間舖，睇過尖沙嘴，但我都係鍾意中環擺花街多啲，2013年一定會開！(投資咗幾多錢？)呢個係商業秘密，今次我係以個人名義開舖。」問他是否在大馬蝕了不少老婆本，今次要捲土重來？陳豪笑言：「我係香港人，想將自己個王國建立番喺香港，舖頭乜都會親力親為，所以開舖之後會減少拍劇，希望放多啲時間同心機喺舖頭。」他又希望把咖啡店打造成住家feel：「舖頭除咗會賣咖啡之外，仲會賣埋曲奇同蛋糕，所有嘢都係自家製。」
陳豪開舖，陳茵媺自然榮升老闆娘。周日(4日)她出席劇集宣傳時直言會大力支持男友：「總之百分百支持佢，有乜幫手我都樂意做。」男友熱愛咖啡形象深入民心，陳茵媺亦大讚對方是百分之二百的咖啡達人：「佢好鍾意試整唔同嘅咖啡同自己炒咖啡豆，所以整出嚟咖啡味道好多層次好豐富，令我對咖啡嘅要求都高咗好多！」提到男友整咖啡就滔滔不絕，但入股幾多就刻意迴避，她只甜笑表示：「我會幫襯同埋幫佢做推廣。(你都有入股？)哈哈！我淨係識做戲，做生意我唔叻㗎！其他嘢都係交俾佢啦！」
其實呢對「雙陳戀」形象正面又得觀眾歡心，如果以「夫妻檔」為舖頭代言，加上陳豪精心研製的咖啡，相信絕對有吸引力，一定唔會蝕本收場！
笑住認老闆娘：周日（4日），陳茵媺出席新劇《大太監》宣傳活動。記者恭喜她即將榮升老闆娘，Aimee笑到瞇晒眼。佢仲話陳豪做乜佢都會支持，可見兩人關係打風都打唔甩。
自從與陳豪拍拖，陳茵媺亦受男友薰陶，日日咖啡不離手。每次開工都見陳茵媺拎住杯咖啡，遲啲有自家品牌，就唔使再幫襯其他咖啡店啦！
深井愛巢
sweet爆餵食
陳豪早年買入將軍澳調景嶺都會駅自住，去年九月被踢爆在深井碧堤半島（圖）築愛巢，與陳茵媺玩煮飯仔互餵。二人逼住公開戀情，不過陳豪仍然死口唔認同居。
藝人副業鋪後路
依家啲藝人真係百足咁多爪，除咗演藝事業之外，唔少公仔箱藝人都會搞吓副業，實行雙線發展，未雨綢繆。
高鈞賢做校長：高鈞賢今年中打波受傷被迫停工，因而騰出空檔搞生意，月前斥資六位數字開兒童藝術學校，擔任校長一職。好友徐淑敏囡囡亦得到贊助，實行以「星級子女」為賣點。
林子善開茶餐廳
林子善今年八月在大坑投資茶餐廳，斥資140萬的他落力為舖頭加添個人特色，把自己為人熟悉的劇集角色加入餐單，舖頭走中價路線，開業兩個月已接近回本。
郭少芸
開連鎖食店：郭少芸04年在朗豪坊開第一間餐廳「match-too（簡單廚房）」，幾年已站穩陣腳，最近再投資百萬，在同一個商場的美食廣場開食店專賣台灣菜。
莊思敏搞時裝：莊思敏年中與孖生妹妹莊思明、莊思華及友人合資200萬，於港島荷李活道開時裝店。主打美國時裝品牌的party dress，開店不久已賺到頭一個月租金，更有意於上海開設分店。
黎諾懿
開車房
黎諾懿與家人合資，位於新蒲崗的汽車用品有限公司於上月正式開業，自己做埋生招牌，仲有成個黎家做後盾，聲言要把車房打造成家族生意。
