周四（8日）霍公子霍啟剛就會同國寶郭晶晶註冊結婚，然後輪住喺南沙（10日）同香港（11日）大宴親朋，仲會放埋煙花㖭！
不過，講到尾，擺酒係俾人睇嘅，做女人始終都係有嘢揸手最實際。好似媽咪姐前排去咗晶晶嘅老家保定走一轉，嗰邊嘅闊太friend就話我知，據聞準霍太喺石家莊附近嘅龍鳳湖淵明源豪宅區，有一座別墅，四周環境好清幽，恍如置身歐洲㗎。睇嚟都係霍公子將金屋贈佳人啦！
不過國寶新娘貫徹低調作風，全屋落閘拉簾，得閒先去度吓假。都啱，有時間不如跟實霍公子，話晒好多人都爭住入豪門㗎。
老家買別墅：除咗廚房無落簾，成間別墅都密封晒，只見門前紅色對聯。而呢間兩層別墅連花園都係3百幾萬人仔，抵喎！
別墅設計走西洋風，但整個豪宅區嘅出入口就走中國風，fusion囉！園丁阿姐話：「前一陣子見過跳水皇后，她的樣子一看就認得出來啦！不過她坐車到門口，一下車就進去。她穿的是一條紅裙子，原來是要結婚啦！怪不得。」
