上周四（1日），群星出席香港Burberry嘅旗艦店開幕活動，場面鬼咁墟冚！好似張曼玉，自早前承認同拍拖多年嘅建築師Ole分手後，極少公開露面，今次都專程由北京返港撐場。唔知係咪少咗愛情滋潤，一向瘦底嘅佢，明顯比之前更乾。影后除咗keep住毛茸茸嘅「髮菜頭」外，手背嘅皮膚都乾到皺晒！呢種凌亂不羈得唔得，真係見仁見智囉。
反觀被封為「中國第一小生」嘅黃曉明，出晒名chok爆，一出場就狂擺招牌甫士。被問到同女友Baby嘅戀情係咪逐漸浮面嗰陣，就含羞答答咁。媽咪姐仲發現佢面上嘅酒凹形狀奇特，祖國嘅奇人奇事確係數之不盡！
乾到下巴皺起嘅張曼玉，手上戴齊十隻鑽石戒指，不過點都唔及佢起晒筋嘅手搶眼，加埋暗黃手指甲，唔知仲以為佢日日要落田開工。
插袋大概係型人指定動作，不過黃生特別添加chok樣，贏咗！黃曉明嘴角輕輕一唧，露出指甲形小酒凹，媽咪姐未喺其他凡人身上見過㗎，好神奇呀！
