除咗台慶亮燈排位，無綫每年影月曆亦係藝人嘅當紅指標。停拍3年嘅無綫月曆，上周末喺網上洩密瘋傳，無綫即時採取行動，要求網站刪除呢批相片。
2013年月曆分唔同主題拍攝，最令媽咪姐驚喜嘅，係非親生仔嘅老戲骨劉丹，竟然拍住陳錦鴻、黃浩然、麥長青等進駐6月份，而「豪嫂」陳茵媺亦升呢拍住林峯、黃宗澤、徐子珊同鍾嘉欣打頭陣影1月份。
不過有人歡喜有人愁，之前有傳俾郭羨妮擸晒BB用品廣告嘅楊思琦連月曆都冇份影，最唔抵係個底花過佢嘅葉翠翠亦榜上有名。呢個世界勁殘酷，思琦妹自從上年錯愛吳帥珠胎暗結後，形象一直下滑，雖然生完女重新開始，但外界反應都係麻麻。依家單親仲要搵奶粉錢，唔該俾條生路行吓啦！
愁爆行街：今年4月美國產後重返娘家搵奶粉錢的楊思琦，工作量唔多，連官方月曆都冇份影，唔怪得早前推住B女行街個樣咁愁啦！
2009年IN：3年前的無綫官方月曆，楊思琦仲挺胸趷籮博出位。可惜今年被飛，而當年一齊影嘅李詩韻仲有得留低，拍住苟芸慧、田蕊妮扮型女。
