楊思琦形象差被飛出無綫月曆，真悲哀，但有份影嘅索女楊秀惠亦唔見好得去邊！皆因去年拖到實嘅男友Raymond Mak最近移情別戀，楊秀惠惟有化悲憤為工作同食量啦！
上周日媽咪姐諗住去TVB canteen飲杯嘢，點知成個canteen得一個客人，就係楊秀惠。佢近排忙到飛起，拍緊賀歲劇《初五啟市錄》同埋主持J2台《姊妹淘》。鬼咩，呢日佢單拖醫肚，真係倍覺傷感。可能趕住入廠啦，佢食得好快又大聲，完全冇儀態可言，媽咪姐以為自己去咗大牌檔。失戀啫！希望佢睇得開啦！
楊秀惠雖然多次被指整容，但假假哋都叫做靚女，佢唔顧形象喺無綫canteen狼吞虎嚥，認真失禮。明年8月份的無綫月曆，由二線花旦騷長腿鬥搶鏡，華姐出身的楊秀惠亦榜上有名。
去年同楊秀惠打得火熱嘅富豪男友Raymond Mak，上個月公開轉嗒沈卓盈。沈卓盈仲大大聲講如果見到楊秀惠都唔會覺得尷尬喎，媽咪姐就唔信喇！
