早排媽咪姐搵咗人氣王蘇基同大家過中秋，有好嘢，媽咪姐當然唔會俾佢停。上個禮拜六（20日），媽咪姐就請咗高登仔至愛嘅心悠BB，殺入MK，同一班《忽周》讀者簽名兼合照，仲同一班宅男零距離接觸。
話晒MK雲集各路人馬，不過心悠BB就淡淡定咁話：「我都識少少功夫，自衞應該冇問題。」
講番簽名會當晚，場面認真誇張，過百個宅男、龍友為咗見心悠BB，幾乎逼爆成條街。心悠同《忽周》讀者合照完，仲向現場圍觀嘅人派佢嘅心心memo pad同新戲《天生愛情狂》poster。咁識做，難怪一班宅男愛死你囉！
錫晒你哋呀！（設計對白）
成為高登仔新貴嘅劉心悠，當晚殺入旺角，即有大批信徒跟住佢一齊喺旺角步行街度行。高峰期嗰陣，條人龍超過百人，到合照嗰陣，亦有成200人喺度圍到實，認真犀利！除咗宅男、龍友，當晚亦有大批師奶專登嚟排隊支持心悠，人群幾乎霸咗整個旺角行人專用區。
當晚有讀者要求偶像做跑步動作，玩開馬拉松嘅心悠，當然冇托手踭啦！呢位四眼哥哥同心悠影相嗰陣，黐到鬼咁埋，不過全程都好規矩，所以冇機會領教心悠嘅真功夫！
當晚一班龍友對住心悠BB，十足螞蟻嘍蜜糖咁，全晚舉住部手機喺度閃呀閃，媽咪姐好奇想問佢哋，唔攰咩！
