唔係話沈卓盈同Ray飲醉，佢兩個拖到實喺銅鑼灣遊街，真係完全沉醉喺二人世界呀。
藝人喜愛夜蒲，尤其前晚係周五，有拖拍嘅紛紛去到夜店狂歡，無綫小花沈卓盈、前港姐王愛倫細仔同日模松岡李那都各拖住另一半出動，中環同銅鑼灣星蹤處處。
沈卓盈早前飛甩機師男友，火速搭上楊秀惠有米舊愛Ray Mak，佢哋拍拖一個月已打得火熱，前晚同一班友人首先去咗銅鑼灣嘅台灣一品花雕雞開餐，食飽飽之後，11點再轉場去CEO唱K。沈卓盈離開就同男友Ray十指緊扣拖到實，佢哋有異性冇人性，一個箭步行先，賣甩同行朋友，佢哋全程陶醉喺二人世界中，去到CEO先會合番朋友，因為Ray要煲煙，佢好體貼叫女友先上樓。
甜蜜望實
分開上樓
松岡李那結新歡日模松岡李那同潮牌GroundZero老闆Philip甩拖後，佢就變成夜場常客，佢噚日凌晨兩點同新歡喺中環老蘭耍樂完，佢哋周圍搵的士返歸，結果男伴搵咗附近外籍看更幫手截先至成功，臨上車前男伴仲豪爽畀咗看更貼士。
夜場媾女
另外，王愛倫細仔、吳千語舊愛Derek前晚出巡中環夜場，佢喺場中同洋妞係咁咬耳仔，佢又請洋妞飲嘢，後來仲一齊打的離開㖭。
