今年六月，劉浩龍單方面宣布同容祖兒拍拖，雖然俾英皇老闆楊受成鬧佢行為鹵莽，但兩個態度照舊，早排仲俾人影到拖手行山。
香港耳目眾多，上到山都俾人發現，出外旅遊係當然選擇。上個禮拜四（十月十一日）《壹》仔喺時代廣場一間書店，見到劉浩龍聚精會神煲介紹日本京都自由行嘅書，手攞兩本眼望一本，好明顯，下一站，京都！
旅行由劉浩龍一手策劃，繑埋雙手乜都唔使理嘅Joey，趁時裝店明星半價大優惠，响促銷開始前一日（十四日），叫埋媽咪幫眼，响中環連踩幾間品牌分店，試定衫mark定貨。
Joey全程睇女裝，連身裙大褸高踭鞋通通唔放過，花多但冇眼亂，事關佢同劉浩龍shopping習慣好相似，就係身著一件眼又望第二件，永冇蝕底！
明星搶先半價優惠，兩母女預早一日落鋪留定心水貨，Joey媽更攞上手逐件睇真啲。
Joey試衫試到唔捨得除，男友劉浩龍一樣，手攞兩本眼望一本，揭吓邊本最啱睇先俾錢買！
