查小欣為咗訪問蘇永康單舊料，踩着個地雷真係老貓燒鬚。電視圖片
大前日查小欣幫無綫做嗰個《爆足一周》為咗單舊料，特登搵咗蘇永康做專訪，各界好大反應，特別係觀眾同行內人插爆佢冇料到，所謂猛料遲足一周。
康仔連番數臭馮仁昭聽聞原來仲有下文，無綫內部人睇完個訪問之後好唔高興，首先奇怪點解要畀蘇永康出鏡，因為蘇永康近年經常勁寸無綫，加上佢幫王維基嘅CTI免費電視台拍劇，諗唔到點解要畀佢亮相無綫，令幕後人更嬲嘅係，同樣幫王維基拍劇嘅張可頤，話晒都係播緊嗰部《天梯》嘅女主角，但因為佢嘅身份而遭拒絕出席任何劇集宣傳，嘩，擺明大細超喎！
其實查小欣今次真正踩中地雷，馮仁昭記得蘇永康確係經常寸無綫，5月做劉浩龍小音樂會嘉賓，喺台上寸無綫畀唔起錢搵人拍劇，另一次係8月佢自己做演唱會時，又同林保怡一唱一和，寸爆無綫唔夠自由度，套《妙手仁心》又照抄外國劇《ER》。查小欣為咗單舊料踩中地雷，今次真係老貓燒鬚。問到張可頤覺唔覺得唔公平？佢好大方咁話：「冇唔公平，我本身要去內地拍劇都冇期，時間配合咪宣傳囉，做唔到亦冇乜大不了，最緊要係觀眾睇套劇。」
