30歲的呂慧儀去年底下嫁港男黃文迪，由宅男女神變為人妻。做人老婆將近一年，呂下個任務當然是生仔，早前她露出三吋事業線出席活動時出晒口術，她說：「將來做人媽咪都可以影大肚相，仲性感呀！」
據知呂慧儀早前趁與老公泰國旅行時，順道積極造人，果然一擊即中，現時她已有餡兩個月。近日二人亦由屯門搬到天水圍的嘉湖山莊，於悲情城市組織家庭。
上周三（9月26日），本刊拍得呂慧儀拖實老公齊齊返新竇，記者發現呂慧儀條腰粗咗，孕味十足。
視結婚生仔為終生目標的呂慧儀（Koni），早前與老公黃文迪（Dickson），甜蜜到曼谷玩四日三夜。難得夾啱時間度假，二人於是開行turbo，乘機努力造人。
黃文迪和呂慧儀兩公婆向來喜歡小朋友，二人去年婚禮上，就不時兩位花女。
呂慧儀和老公上周二（9月25日），帶埋兩位小朋友到迪士尼暢玩，感受為人父母的滋味。
曼谷造人成功
一名呂慧儀身邊密友說：「Koni兩公婆好鍾意小朋友，我哋成日讚佢哋咁靚仔靚女，應該唔好嘥。上次成班姊妹約食tea，點知Koni話要做檢查嚟唔到。我哋問佢咩事，佢又話依家未講得，咁大家心照啦！」據知呂慧儀現時已懷孕兩個月，腹中塊肉的性別尚未知道，但今次始終是第一胎，所以她份外緊張。知情人士說：「佢同無綫講咗話嚟緊一年要少啲拍劇，咁無綫都好體諒佢，安排佢嚟緊主力做綜藝節目。」
呂慧儀婚後和老公於屯門某私人屋苑一個500呎單位築愛巢，為了迎接小生命，近日二人就以八千多元，租住天水圍嘉湖山莊一個708呎單位。上周三（9月26日）下午，戴住黑框眼鏡的呂慧儀就與老公手拖手，由附近商場步行返新竇。其間記者發現，呂動作緩慢，腰和下圍有向橫發展跡象，孕味十足。知情人士說：「Koni同Dickson都喺天水圍大，對呢度好有感情。所以Koni唔會理咩悲情城市，一家人住得開心就得。」
之後二人慢慢行入新居大堂，看更亦識做開定大閘。記者發現黃文迪返新居時經常四圍望，而孕味濃的呂慧儀，連臀部都大埋。
28/9返娘家做節
呂慧儀老公揸老婆09年以約47萬買的本田七人車，載住老婆和她胞弟，到岳父所住的屯門龍門居做節。
呎租破頂
據知呂慧儀近日以月租8千5租住一個708呎高層單位，呎租12元。天水圍唔就腳，樓價向來低迷，不過近日樓市熾熱，連樓齡20年的嘉湖山莊都升埋一份。呂慧儀今次支付的呎租亦是破頂價。
送樓俾父母
呂慧儀09年豪氣地以200萬買入龍門居一個高層單位，俾父母居住，此物業由呂慧儀和父母聯名持有。
呂：搵多啲錢先
呂慧儀06年參選港姐時身形甚弗，要腰有腰，跟現時有餡的她，的確差得很遠。
周一（1日），記者致電呂慧儀，提到造人成功一事，她避忌說：「我哋去曼谷旅行啫。我啱啱先結婚，想過啲二人世界先呀！我唔係唔想生，不過有小朋友真係好大責任，要努力搵多啲錢先。（點解同無綫講唔拍劇？）我不嬲都少拍，嚟緊做大型綜藝節目呀！（搬咗去天水圍喎？）我哋有屋企人住呢邊，所以先成日過嚟啫！（擔唔擔心第時小朋友喺度成長？）唔會擔心囉！我同老公都喺呢度大，屋企人全部住晒呢頭，可以爭取時間見面，唔會考慮搬其他地方。」想當初她結婚都玩失驚無神，今次她否認懷孕，明顯是怕BB小器！
靠外快搵食
06年港姐季軍呂慧儀，出道以來在無綫實質工作量不多，不過由於她身形高䠷，兼擁有34D身材，所以不少客戶搵她出席event晒身材，單是今年已為她賺近百萬。
劇集酬勞
《東西宮略》約10萬
《女警愛作戰》約10萬
主持
《三個女人一個墟》約5萬
活動
截至今年9月底，呂慧儀先後出席了40個活動，包括上月為海洋公園萬聖節活動嚇鬼。約60萬
合共賺約85萬
奀星變教練
呂慧儀老公黃文迪，今年35歲，讀過警校的他，練得一身肌肉，畢業後索性做model搵食。黃08年參選港男，最後大熱倒灶，落選後與無綫簽了一年藝員合約。可惜合約期內，黃一直被投閒置散，試過被安排在遊戲節目《大咕窿》扮熊人（左圖）推嘉賓落水，連鏡都冇得出。黃對娛圈心灰意冷，決定改行做私人健身教練，每月穩袋兩萬。
