范姜前晚同周汶錡嘅御用化妝師現身機場，起程去法國出席婚禮。
現年38歲嘅名模周汶錡（Kathy）將低調喺9月29日同35歲法籍男友Julien Lepeu喺法國尼斯結婚，近日好友們陸續分批飛去，據知另外有批朋友噚晚起程去法國。前晚11點幾，范姜同Kathy嘅御用化妝師Onix B.喺機場航班商務客位櫃位，辦理登機手續，準備飛去法國出席好友婚禮。見范姜戴住黑框眼鏡，同Onix B.沿途有傾有講，唔知係咪講緊Kathy嘅婚禮呢？
周汶錡同男友將喺法國結婚，但一直保持低調。資料圖片
范姜不忘喺飛機上影相，仲擺上微博。
周汶錡舊愛杜德偉前晚大方向前度送祝福。
杜德偉祝福舊愛另一邊廂，周汶錡嘅舊愛杜德偉（Alex）前晚出席葉蒨文演唱會慶功宴，講到即將同26歲女友Ice結婚，踏入人生新階段，Alex開心話：「會係喺11月11號結婚，但地點未定，因為賓客名單都未定好，我哋都有傾過生BB嘅事，但工作比較忙，暫時唔諗住。」兄弟團由佢嘅圈外朋友出任。被問到前女友周汶錡月底結婚，Alex大方話：「梗係知啦！會透過你哋（傳媒）恭喜佢。」
