【今日我至hurt】周永恒夫婦噚日現身，一個傷手，一個腫面，不過最hurt都係事發嗰陣，個個食花生袖手旁觀。
歌手周永恒（Roy）的老婆趙頌茹（阿Yu）將於下月初分娩，前晚兩人到屯門醫院做產檢時，跟一名內地男子疑為排隊打尖及拍照問題起爭執，事後Roy報稱被打腫面，阿Yu雙手受傷縫六針，昨日他們在家休息後仍驚魂未定，Roy感慨可能中港兩地文化差異，更埋怨事發時竟沒人伸出援手。
周永恒前晚8時許陪老婆到屯門醫院做產檢，期間兩人在大堂「一粥麵」排隊買食物，Roy發現有一名男子疑打尖即喝止對方，後來又見到跟男子同行的小童在大堂跑動，Roy就用手機拍攝，結果觸怒對方被追打，阿Yu勸阻時反被擲來的膠凳割傷手，警員到場後拘捕涉嫌傷人男子。
昨日Roy和老婆留在天水圍的寓所休息，下午4時許他們帶女兒去超市，並接受本報記者訪問。休息一晚後的阿Yu仍面青青，她的右手被包紮，左手貼了膠布，波鞋仍有血漬，阿Yu說：「左手縫咗六針，因為我係旁觀者，打人過程睇得最清楚，佢哋唔係爭執，係老公俾人打，當時有位先生打尖，老公叫佢排隊，之後我去咗買嘢飲，返嚟見到對方用鼻尖兇老公。」
手縫六針
鞋頭濺血
前晚周永恒陪妻到醫院做產檢時遇襲，要報警求助。資料圖片
「佢個樣想殺人」阿Yu見該男子咬牙切齒，大講粗言穢語，她說：「佢講唔鹹唔淡廣東話，因為自己大肚好驚，所以我即刻報警，同佢一齊嘅細路仔喺附近望住我哋，老公諗住報警想有證據，就用手機影相。」
Roy形容對方一時發笑一時激動，狀甚恐怖：「佢突然發癲走埋嚟從後箍頸，將我成個人抽起，之後攞櫈打我，又攞筷子插我，好似《少林足球》十八銅人咁攻擊我，混亂間老婆雙手流血。」阿Yu亦激動說：「佢個樣想殺人咁，現場有保安同好多人，但冇人理，可能驚殃及池魚，差人嚟到問乜事？我話佢打人，佢即刻發癲咁一拳打老公塊面，保安先撲出嚟話：『制服佢』。」
「叫救命冇人幫」Roy憶述被打過程竟沒人援助，他續說：「佢追住我個頭嚟打，叫救命都冇人幫手，好心痛，呢度係香港，點解會咁？叫排隊好正常，呢啲可能係兩地文化差異，嗰啲人唔慣排隊。」阿Yu亦稱：「好無助，估唔到嗰個男人有小朋友都咁狠。」事件現已交警方處理，幸Roy驗腦後無礙，阿Yu的傷勢亦輕。問以後會否不出聲？Roy說：「冇可能，一定冇得退，見到大肚婆都會讓位，見到人打交應該喝止，呢件事啟發希望大家再諗諗道德價值觀，香港人唔應該咁樣，可以做得更加好。」
