47歲錢嘉樂終於肯做老襯娶37歲湯盈盈，奉子成婚全城恭喜。點知最近錢嘉樂遭踢爆拍劇集《巴不得媽媽》時，與新宅男女神岑麗香暗撻，女方熱情奔放又主動，錢嘉樂把持唔住揸車管接送。結果觸動湯盈盈的大肚婆神經，進行掃狐大行動。
據知湯盈盈去年與岑麗香主持《明珠生活》時非常投契，更為對方拉線埋曾志偉堆。但野心勃勃的岑麗香唔止姣黐志偉博上位，就連錢嘉樂都中伏，盈盈引狐入室唔嬲就假。日前她更向密友狂數女方識冧仔。
錢嘉樂為補鑊，除高調宣布11月會在洲際酒店擺酒，買樓買車陪產檢，仲話以後唔敢再親親女拍檔。樂樂咁有誠意，準錢太盈盈唔知收唔收貨呢？
樂樂使乜氹番盈盈
錢嘉樂與岑麗香最近在新劇《巴不得媽媽》中演鬥氣寃家，劇中日久生情變情侶。竹昇妹岑麗香雖然廣東話麻麻，但得意表情加33C激凸上圍，火速在網上爆紅，成為新一代宅男女神。
攻陷樂樂
今年三月，錢嘉樂接拍《巴不得媽媽》時，面對岑麗香吓吓熱褲吊帶谷胸誘惑，即使係情場老手錢嘉樂，一樣把持唔住，經常以順路為由，放工載香香返香閨，終激嬲正印湯盈盈。《蘋果日報》圖片
胸頂手踭
在《巴》第十一集中，講述錢嘉樂右手脫臼，岑麗香即時除bra幫他包紮，鏡頭更大特寫她胸頂錢嘉樂手踭。
豪放鬼妹易上位
前年奪得中華小姐冠軍的岑麗香，極速由《怒火街頭2》的大茄，搖身變成《巴》劇女主角。上位神速，全因夠搏唔錫身。熱情奔放性格比起港產保守姐仔，當然更易爬上位。
主動求志偉摸籮
岑麗香在七月中拍攝《玩轉三周1/2》。飾演遊客的她，與扮鹹濕海關曾志偉做對手戲。原本劇情只需志偉借位摸香香pat pat，誰知香香忽然加摸籮戲，更表示：「咁先似真嘛！」識途老馬曾志偉當然無任歡迎。
MV自度濕吻林峯
在林峯MV〈人一個〉中，岑麗香首次擔任女主角。面對chok峯，有指香香主動向導演加插濕吻戲。周三（12日）林峯透過經理人回覆本刊說：「我同佢（岑麗香）喺中華小姐度見過，嗰次MV都係去到現場先知佢做女主角。（知唔知係佢主動加濕吻戲？）唔清楚，我都係聽導演指示。」
請教為名姣黐為實
不過香香女神唔止kill宅男，就連情場浪子錢嘉樂亦中招。據知岑麗香在《巴》劇第一次擔正女主角，唸對白時經常主動請教錢嘉樂，二人一拍即合。撩慣女仔的錢更幫女方改了花名做「噚日香」。岑麗香不單冇嬲，還經常返工放工黐錢嘉樂車。即使唔係同一時間放工，都會等埋一齊走。
女追男隔重紗，岑麗香的熱情主動，很快就電暈錢嘉樂，加上兩人同是大聖劈卦的門生，女方不時向大師兄請教，有共同興趣愈行愈埋。知情者說：「香香喺加拿大已經有學大聖劈卦，拍劇時同嘉樂仔講起，先知道大家係同門師兄妹。香香成日捉住嘉樂仔問長問短，仲話約埋一齊切磋。平時邊會有女仔同嘉樂仔傾呢啲嘢㗎？」有指拍完《巴》劇，岑麗香仍然咬住錢嘉樂唔放，兩人不時以電話及短訊聯絡，身為男方枕邊人的湯盈盈，又點會唔醒水？
湯盈盈在無綫布滿線眼，加上密友Toby梁靖琪在內睇實，錢嘉樂實在難逃五指山。據盈盈密友透露，「大肚婆情緒特別易波動，件事未俾傳媒踢爆，盈盈已經收到風，仲嬲到搬咗去好姊妹屋企住咗兩日，想冷靜吓。嘉樂仔當然知驚，搵咗好多朋友做和事老，最後親自上門番盈盈。佢解釋話係女仔黐埋嚟，見佢乜都唔識所以教吓佢，絕冇其他意思。」盈盈人前裝作冇事發生，事實上暗地裏已策劃掃狐行動。她更曾致電密友訴苦，指岑麗香非常有機心。知情人透露：「盈盈同我哋講，話個女仔（岑麗香）最初扮乜都唔識，成日盈盈帶佢出去啲聚會見識吓，仲話想識吓志偉㖭，盈盈最初覺得佢份人冇乜嘢，咪帶佢出席function囉，點知佢會搞埋嘉樂仔啫！盈盈話佢成日對住男仔挨身挨勢，好識冧仔，自己今次都睇漏眼。」
擁多個學位
27歲的岑麗香，是2010年國際中華小姐冠軍。她在加拿大溫哥華出生，父母是溫哥華的越南華僑。前年，她在加拿大的崑崙理工大學畢業，擁有時裝設計學士、市場管理學士以及人力資源學士的文憑。畢業後，她曾是一位英語會話老師。加入無綫後，曾參與劇集。
雖然只拍幾套劇，但由於身材惹火，引起不少網民注意，當中有讚有彈。近日岑麗香更因走紅而狂接商場騷，騷價每個三萬。現時岑麗香與另一華姐租住將軍澳中心，月租萬五。
Toby和盈盈情同姊妹，今次盈盈俾人蝦，Toby即幫手掃狐，更使橫手向岑麗香報復。
密友代出頭
姊妹有難，有份與湯盈盈在《衝上雲霄2》拍攝的Toby（梁靖琪），與有份在劇中飾演空姐的岑麗香，不時撞口撞面。有指Toby每次與岑麗香同場，都會出言單打，更因為父親是高層梁家樹的關係，Toby為代好姊妹出頭，使橫手叫劇組安排岑麗香連日開天地更（朝早與晚上都要拍）。難怪岑麗香最近放了不少拍劇時累爆的照片上微博。
其實湯盈盈今次氣難下，是因為她一直視岑麗香為好姊妹。去年9月兩姊妹合作主持《明珠生活》，兩人同是鬼聲鬼氣一拍即合。為提攜新人，湯盈盈更介紹她給曾志偉認識。對演藝事業野心勃勃的岑麗香，絕不會放過任何機會，每次見到志偉都主動出擊，憑其嗲聲嗲氣令對方留下深刻印象。去年底志偉監製的《2012我愛HK喜上加囍》，新丁岑麗香亦有份參演。
兩周前，岑麗香通宵拍完《衝上雲霄2》後，將自己殘樣放上微博
對佢印象好好（真實對白）
香香懶理盈盈，估唔到連就快做新郎的錢嘉樂一樣口沒遮攔。周三（12日）在寓所揸車到柴灣車房的他，對着記者狂讚香香之餘，更直指唔使番盈盈，「其實成件事都係幫套劇宣傳，佢（岑麗香）係好女仔，仲好聰明，對佢印象好好。（有冇番盈盈？）使乜佢啫！」
嘉樂仔好錫我（真實對白）
新一代姣精岑麗香姣黐錢嘉樂，辣㷫大肚盈盈。雖然遭盈盈好友Toby報復，但周三（12日）出席活動時，岑仍不避嫌讚錢嘉樂為人細心。「佢好錫我，對我好好！」鬼妹仔果然得出就。
8月22日，岑麗香出席完《巴不得媽媽》宣傳活動，雖然當日錢嘉樂都在場，但岑麗香知道有記者𥄫實，沒有黐車坐。她獨自逼地鐵返回將軍澳，先去超市掃貨，然後回將軍澳中心寓所。
岑麗香姣黐錢嘉樂報道出街，湯盈盈即日將自己和岑麗香的合照放上微博，更指對方是好朋友，以圖平息嘉樂偷食風波。
至今年7月中，岑麗香錄影《玩轉三周1/2》再有機會黐志偉博上位。節目中有一短劇是志偉做鹹濕海關人員，岑麗香做去外遊的市民。過關時志偉竟出手摸勻香香全身，觀眾大感詫異，但香香卻看似非常享受。知情者透露：「拍嗰段片前導演都有同香香傾過，本來係叫志偉作狀摸，點知香香主動提議真係摸落去，佢話咁樣逼真啲。女嘅開晒綠燈，志偉梗係去盡啦！之後拉大隊去食消夜，香香就黐實志偉喇！叫佢飲酒又乖乖聽話，啱晒志偉胃口。香香仲打蛇隨棍上，志偉今年再開賀歲片，記住預個角色俾佢。」
香香：我未番盈盈
搞到錢嘉樂與湯盈盈婚前吵大鑊的岑麗香，周三（12日）出席公開活動時表示緋聞未有影響三人關係，但就講明未番盈盈。冇激嬲人又使乜呢呵！
記：記者岑：岑麗香
記：早前係咪同錢嘉樂行得好埋？
岑：哈！我哋冇嘢，我哋係朋友。
記：點解之前拍劇成日要錢嘉樂車你收工？
岑：其實盈盈都有車過我，我哋三個都好好朋友。之前喺好朋友嘅生日會上我都有見過佢哋。
記：嘉樂仔拍劇時係咪好照顧你？
岑：佢好細心，好錫我，仲對我好好。
記：有冇同盈盈解釋過？
岑：我同盈盈係好朋友，之前一齊做節目。但呢件事發生後我未打電話俾佢番佢。
記：盈盈介紹志偉俾你識？
岑：都係錄影《玩轉三周1/2》先識志偉，啱啱先識囉！
記：節目中扮遊客過關，你主動提出可以摸籮？
岑：呢啲好小事，為演出冇所謂啦！
岑麗香口口聲聲話同盈盈係好朋友，但又同錢嘉樂唔避忌，今時今日仍公然話男方好錫佢，真係講多錯多。
周一（10日），盈盈被拍到孖住同樣大肚的周家蔚，到尖沙嘴加連威老道買平價衫。買衫本來係女人至愛活動，但盈盈當日卻全程黑口黑面。《蘋果日報》圖片
除了掃平價衫，當日盈盈亦只到附近茶餐廳食個幾十蚊廉價下午茶。呢個老婆咁知慳識儉，嘉樂仔真係要好好對人啦！《蘋果日報》圖片
現時佗了三個多月ＢＢ的湯盈盈，身形明顯較前豐滿，腰圓肚凸。為了補充營養，她當日便到街市買豬肉返屋企煲湯。《蘋果日報》圖片
四招箍盈
錢嘉樂和岑麗香今年3月合拍劇集《巴不得媽媽》時，由於玩得好埋，有傳當時湯盈盈已嗅到味，大發雷霆。為補鑊，一向低調避談戀情的錢嘉樂，亦惟有一改作風，使出四招撒手鐧冧湯盈盈。
蘇梅島求婚
激嬲盈盈後，錢嘉樂為補鑊，今年6月與湯盈盈到「撻着之地」泰國蘇梅島旅行。
湯盈盈與錢嘉樂旅行時「一擊即中」，喜獲蛇B，預產期為明年3月中。錢嘉樂得知她有身孕後，不時陪她產檢。上月，本刊亦獨家拍得兩人到養和醫院照超聲波及睇報告。
高調談結婚
8月底，錢嘉樂綵排鄭伊健演唱會時，大方向在場傳媒宣布向湯盈盈求婚成功。而在演唱會尾場時，錢嘉樂亦高調拖住湯盈盈前往睇騷。最近，為新劇《巴不得媽媽》宣傳的他，每次出席活動時，均向傳媒透露胎兒情況，及公布婚宴將於11月初舉行，筵開50席，十分高調。
換樓換車
為迎接小生命來臨，現居西貢匡湖居的錢嘉樂，有意翻新愛巢給湯盈盈及BB，更打算將辣跑轉做七人車，方便妻兒出入。他承認：「我都同盈盈諗過，係咪要買過間屋。其實住緊呢個地方都好舒服，咪諗住換咗啲裝修同翻新囉，車都要轉過部大車。」
