乖乖女鍾嘉欣一向好慳家，慳埋慳埋俾晒屋企人。去年底，以6位數字買咗個名牌手袋俾阿媽做聖誕禮物，今年中再被《忽周》發現，以一千五百萬港幣喺溫哥華買咗間獨立屋俾屋企人住。
努力搵錢養家之餘，鍾嘉欣仲經常帶媽咪出席活動。周日（9日），佢到屯門出席「健康第壹大獎2012」頒獎典禮，媽咪姐就見到鍾媽媽陪住愛女到場。當日嘉欣忙住做訪問，鍾媽媽一直獨自留守後台。直至完場，佢先有機會同愛女傾偈。不過一見記者影相，嘉欣竟然唔認阿媽，搞到場面都幾尷尬。其實嘉欣都係擔心阿媽曝光啫，用心良苦呀。
喺後台，鍾媽媽幫愛女拎住個袋，一個女人拎住3個袋都咪話唔辛苦。
鍾嘉欣同媽媽感情要好，早前佢仲喺微博大晒媽媽準備嘅住家飯。
