「宅男女神」劉心悠連續6年成為dermes激光脫毛代言人，日前仲以大師姐身份，帶住新加入嘅薛凱琪(Fiona)同謝婷婷拍攝新一輯性感廣告。咦，又有新嘢睇？媽咪姐梗要去探吓班！
未埋位時，現場一片嘰哩咕嚕，因為3個靚女都係ABC，佢哋一時講英文一時講國語，工作人員都轉唔切channel同佢哋溝通。拍攝嗰陣，個個都吊帶短裙，露前又露後，十分之咁sexy！再加上每人着對6吋斗零踭，又自發性扭晒腰擺甫士，女人味十足，電死在場嘅媽咪姐同一班男工作人員喇！成個廣告影咗兩日，雖然夾埋用咗成30個鐘，但3個靚女竟然愈夜愈興奮，其間仲叫工作人員播歌兼要開到最大聲，婷婷話當正去蒲咁happy喎！「我哋3個好好笑㗎！一聽到音樂聲，就自然好興奮咁喺度跳舞，完全唔記得眼瞓。」
Fiona同婷婷一輪嘴英文猛咁傾，一個踢拖一個着懶佬鞋，果然係鬼妹仔。
拍攝現場打晒燈，怕熱嘅婷婷真空上陣，仲忍唔住拉起條裙唞涼㖭！
