嘉穎（中）同韓雪（右）噚日好受歡迎，娜姐就備受冷落。
鄭嘉穎、周秀娜、元華同內地演員韓雪及宋洋，噚日喺蘇州為劇集《葉問》宣傳，一班演員喺商場同fans見面，現場以嘉穎同喺劇中同佢演一對嘅韓雪最受歡迎，反而香港嘅宅男女神娜姐就冇乜人識。當演員搵fans上台玩遊戲親近一下時，連元華都有人揀，反而娜姐被冷落，最尾先有個男仔話要上台同娜姐玩。
現場播出宣傳片，當中無端端有場嘉穎同娜姐嘅咀戲，但呢幕只係拍嚟放喺宣傳片。又有場戲娜姐激勵癱咗嘅宋洋企起身，結果除衫大露背，劇情真係重口味。講到同娜姐咀嗰場戲，嘉穎話：「臨時加，我都唔知點解要拍。」嘉穎演葉問，問怕唔怕俾人攞嚟同甄子丹比？佢話電影同電視冇得比，講武功自己由零開始。
嘉穎同娜姐喺宣傳片中無端端錫錫。
娜姐大露背刺激癱咗嘅宋洋。
韓雪冧嘉穎現場見韓雪好似幾冧嘉穎，佢自爆主動同嘉穎傾偈，又買嘢畀佢食，嘉穎解釋：「演員私下溝通好平常。」娜姐講到同嘉穎咀，佢話都幾緊張。至於拍大露背戲，娜姐話拍攝時有清場。咁宋洋有冇真係有反應？娜姐笑住話只見佢流汗，再問宋洋有冇乜地方暗地裏起咗身？娜姐就笑而不答。
