《今日我至驚》
阿Sa噚日論盡行騷，差啲成個跌低，好彩最後冇事，梗係要拍吓心口定驚，如果唔係就瘀皮到爆啦！
「慢必」陳志全當選立法會議員後公開同志身份，並揚言要爭取同性戀婚姻合法化，同樣勇於「出櫃」的歌手黃耀明，希望對方講得出做得到，泛民和建制派都可以支持；而在反國教事件上被封「良心歌手」的明哥，慨嘆被打壓好恐怖，不知自己可以撐幾耐！
黃耀明和蔡卓妍（阿Sa）昨日到尖沙嘴為鞋履品牌壓軸行騷，輪盡的阿Sa幾乎絆倒，邊拍心口邊行天橋，事後她自嘲：「好搞笑，自己真係驚，好在冇坐低。」日前挺身撐反洗腦的明哥，剛從北京工作返港，他說：「喺北京好安全，我冇犯法，點解會有事？如果有事就真係要走！」有記者嘆謂冇得走，明哥笑說：「我都走唔到，只有特區護照，要走就投奔怒海。」
黃耀明希望慢必能為同性戀者爭權益。
當選後「出櫃」的慢必（左），前晚捧場睇《一路向西》首映。
「係好差嘅施政」問會否再支持反國民教育？明哥說：「雖然學生離開廣場停止絕食，但抗爭未完，未撤除只係掩眼法，唔啱應即刪除科目，唔係逐樣做，咁樣係好差嘅施政。」對於被封為良心歌手，明哥坦言有壓力：「其他人有良心都冇用，現實迫人好恐怖，有人想講一兩句都被打壓，唔知幾時打到嚟我呢度，我有壓力，唔知可以撐幾耐。」不過明哥表態一定會唱反國教歌《Can we talk》。
撐泛民的黃家強，在微博上載劉江華惡搞圖。
盼慢必言出必行對於立法會選舉完結，慢必當選議員後承認是同志，更表示會為同性戀者爭取權益，包括婚姻合法化，慢必前晚去尖沙嘴出席《一路向西》首映；而早前在達明演唱會上直認「出櫃」的明哥，亦希望同志在香港可合法結婚，他說：「希望佢做到，其實唔止佢，何秀蘭（工黨副主席）係最支持，有志願組織都希望立法反歧視、婚姻法，希望到時民主派同建制派都支持。」
提及民建聯的劉江華落選全城歡呼，明哥說：「梗係有留意，咁揚，我當然希望佢輸，想多啲泛民人有議席，一直撐佢哋，不過建制派配票好勁，要數學犀利嘅人先計到，睇到有操控。」而撐泛民的黃家強昨日在微博上載劉江華惡搞相，留言：「開香檳！哈哈！」
