29歲宅男女神賈曉晨（JJ），與大她10年的武打演員樊少皇被揭撻着，本刊率先揭發樊有仔有老婆，連日來不斷被爆臭史。據知樊少皇4年前到國內拍劇認識的杭州女助手，至今仍未分手，臭史陸續有嚟，本刊得知，樊少皇10年到北京宣傳《美麗密令》時，更有傳帶國產妹上房。即係話，JJ傻吓傻吓做咗小四、小五……
事發之後，除了經理人公司Snazz，譚詠麟和阿叻老婆黃杏秀都力勸JJ斬纜。但一心以為可以上岸的JJ，連日來失眠，情緒面臨崩潰，接受本刊訪問時說︰「我都好失望，鍾意咗一個唔應該鍾意嘅人，我就嚟頂唔順。」
據知，今年3月JJ認識樊少皇不久，男方便展開追求，JJ第一時間向公司報告，直到正式拍拖一星期，JJ公司Snazz才得知，原來樊已有一對仔女，公司即要求JJ馬上跟對方分手，但JJ反為男友解釋，說他們已分手。知情人士說︰「爆咗佢有老婆、仔女之後，叻哥、志偉同秀姑都勸JJ分手，但JJ一味話同樊少皇拍拖前，佢已經單身！咁都信？個個都話佢太純，𠵱家仲爆多個杭州妹，公司好嬲呀，叫JJ唔好再幫口，覺得樊少皇應該企出嚟一次過講清楚。」
上年到橫店拍攝《倩女幽魂》時，杭州女助手（右二）更跟住樊少皇（右一），與一眾演員打邊爐，但當時發生陳嘉桓遇狼事件，大家都沒有發現坐在樊少皇身邊的，正是其杭州女友。網上圖片
跟了樊少皇20年的「老婆」，上周終於為事件開腔，事隔幾日，再爆瞞住JJ有助手女友，樊少皇真係有排煩
00年樊少皇同「老婆」去台灣旅行，第一次被傳媒拍下合照，之後兩人沒有再一起出現。
經理人鬧到喊
02年入行，JJ近年事業才有起色，而且身為Snazz老闆的殼王（陳國強）成為無綫新老闆，JJ得益好多，劇集輪住出，「小三」事件後，上星期JJ被召返公司照肺，其經理人文迪說︰「我鬧到佢喊，公司唔係阻止佢拍拖，但要搞清楚啲關係先！」
JJ與沈震軒6月分手後，火速搭上樊少皇，一心諗住有新歡治情傷，點知仲傷
拍攝《大武當》時，杭州的女助手有隨劇組開工，當時樊少皇（左一）向人介紹她為自己的「女朋友」，幾個月之後又力追JJ，認真花心。《蘋果日報》圖片
酒店藏國產妹
樊少皇接二連三被爆情史，全因樊是第一代北上搵人仔的藝人，尤其是《葉問》之後，除了獲得「金像獎」男配角提名外，身價更加暴漲，自然多女埋身。
10年樊少皇到北京宣傳《美麗密令》時，就發生了一件傳聞。據劇組人員透露︰「當日check out晒，臨離開去機場時，有位演員漏咗證件喺酒店，工作人員打返酒店叫人逐間房搵，點知隔咗一陣，酒店打返嚟，話搵到證件，但其中一間房入面有位女士，嗰間房係邊個唔使問啦。呢件事全個劇組都知，但大家都好似見怪不怪。」雖然不能肯定房中是否樊的杭州籍女助手，但今年初，樊到橫店拍攝電影《大武當》時，已向人介紹這位女助手是其女朋友。據知，這位女助手4年前開始幫樊工作，每次到國內拍劇拍電影，樊都會請她幫手，而4年間，女助手亦升呢為女友，而這位女助手性格豪爽，更煙不離手。
對於男友再爆情史，JJ由小三慘變小四，她已由維護變到心淡，她說︰「其實佢（樊）都有同我講呢個助手，我知嘅係，佢哋拍咗拖幾個月，總之我係唔會做小三、小四。」問到跟樊少皇之後的發展，JJ說︰「我都好失望，鍾意咗一個唔應該鍾意嘅人，我就嚟頂唔順，希望大家唔好再畀壓力我。」先因沈震軒有小三，JJ發現怒飛，𠵱家再嚟個樊少皇，JJ真係要帶眼識人，咪再懵盛盛啦！
今年4月，有網友在山東濟南一間咖啡店拍下樊少皇。巧合地，JJ的家鄉就是位於山東濟南，但樊少皇對面嗰位妙齡女子又唔似JJ喎
踏入2012年，JJ除咗劇接劇，亦多廣告，最近就替內衣品牌黛安芬拍內衣平面廣告，形勢原本大好，但𠵱家爆出負面新聞，暫未知對佢事業會唔會有大影響。《蘋果日報》圖片
樊父（真名姓梅名生）於80年代花19萬買入的紅磡舊樓單位，現市值約160萬
譚詠麟和陳百祥睇住JJ入行，私下亦好錫JJ，更不時安排演出機會，見到JJ慘成小三、小四，點都要出句聲。
樊少皇少探病父
被爆有老婆後，樊少皇馬上澄清4年前已跟未婚女友分手，但一直有撫養一家三口，本刊打聽其父親、前邵氏演員樊梅生的行蹤，但一直未能聯絡。於09年，港台為樊少皇拍攝特輯《各路英雄》，當時希望樊跟父親一起出鏡，但樊梅生當時身體已出現問題，更有傳需要入住老人院，現在可能還未知兒子發生「大件事」。
週日（26日），記者到樊梅生位於紅磡的住所，屋內沒有人應門，但看更就確認上址為樊父母的住處，而且很少見樊少皇出入探訪，更有指樊梅生可能已搬到國內。
樊少皇2歲時已跟隨父親出入影棚，中學以後被送往少林武術隊讀書，95年簽約無綫，後來改到台灣發展，憑劇集《天龍八部》及《少年英雄方世玉》走紅。
