《今日我至慌》
阿倫見到記者雞咁腳走，仲夾硬同人逼上車，使唔使慌張成咁呀！
譚詠麟（阿倫）上周四（23日）62歲牛一，正日睇怕都係family day，孖住阿仔曉風同紅顏知己Wendy天倫樂，不過一向人緣好嘅阿倫，單係要朋友輪住請佢食生日飯，睇怕食物焚化爐都有排忙。上周五晚，壽星佬就同殼王陳國強夫婦、彭健新、鄺美雲同顧紀筠等，一行十幾人去咗銅鑼灣食飯，睇嚟都係同阿倫補祝生日。
Wendy同阿倫飯後離開嘅時候，Wendy除咗殿後，仲笑笑口望住阿倫。
顧紀筠一身黃衣打扮，十分醒神。
陳國強不停安排友人上車。
繼續做背後女人好似食咗防腐劑嘅阿倫近年越來越公開同Wendy嘅關係，慶生又點少得Wendy，雖然佢已係一子之母，但身形仲保持得好好，佢着住星星圖案上衣配貼身褲，打扮大方。Wendy過去都係做阿倫背後嘅女人，估唔到佢哋上車走嘅時候，Wendy都推阿倫上先，自己繼續「殿後」，不過唔知係咪知有記者影相，阿倫同朋友就爭住上車，好搞笑。
