之前被網友狂插嘅阿徐，噚日喺活動度話會減少玩微博。
啱啱放完長假嘅徐濠縈，噚日喺海港城出席護膚品活動，腳踏七吋Alexander McQueen白色高跟鞋嘅阿徐，早排因為不滿旅行期間俾人狂影相，喺微博上鬧，搞到俾強國人及網友狂插，事件後首次出席活動嘅阿徐，話唔想再提件事，不過家都玩少咗微博，轉戰自己同舖頭個blog，佢話：「自從同阿臣（陳奕迅）一齊之後，都成日俾人攻擊，我一向EQ都OK，屋企人知乜事就得啦。
陳奕迅投訴老婆阿徐設計嘅歌衫太熱，搞到兩公婆嘈交。
試過爆蛋嘅陳奕迅，前晚仲夠膽企喺台邊同粉絲握手。
為歌衫嘈交阿徐自爆同老公陳奕迅（Eason）因為演唱會件衫嘈交：「我幫佢設計咗套衫，但係唔知佢要連續跳25分鐘，佢話我件衫太熱，想唔要頂帽同件褸，但係知係我設計又唔敢唔着。」
Eason三場演唱會前晚完騷，觀眾猛讚佢靚仔，Eason好風騷咁話：「我老婆仲靚，不過喺老婆眼裏面，囡囡最靚。」演出期間Eason叉錯腳險跌落台，試過爆蛋嘅佢自嘲話：「唔係又爆蛋呀？爆埋嗰隻唔得掂。」有觀眾叫佢減肥，佢抵死話：「唔係減，我要keep fit，我要make baby。」
