42歲嘅郭少芸自認係盛女，仲話：「單身咗好多年，真係慣晒！」慣還慣，但有時都要適可而止搵番件猛男做觀音兵調劑吓。呢期佢就睇中細自己18年，同「高登女神」苟芸慧「掟煲唔掟蓋」嘅80後港男冠軍羅天宇嘞。
早前媽咪姐喺電視城撞到郭少芸拍住《愛•回家》嘅羅天宇齊齊上停車場攞車。揸住架白色寶馬嘅羅天宇認真有風度，由電視城出車去到將軍澳中心就放低郭少芸。咁家住港島東區嘅郭，就惟有再搵的士駁腳。雖然同港男短短十分鐘車程，但睇吓郭少芸落車嗰副冧樣，就知呢位有家底又有肌嘅後生仔的確有辦法！難怪29歲嘅苟姑娘都同佢分極分唔開，明明話分手，轉頭又返佢屋企做「新抱仔」啦。
同車冧爆
坐完順風車，郭少芸落車嗰陣表情風騷，有回春感覺。
早幾日，郭少芸同羅天宇齊齊出席《愛•回家》活動，全程企埋一齊不特止，後者俾吳家樂整蠱仲即刻匿喺「姐姐」後面，媽咪姐不嬲都話盛女有market㗎啦！
無論拍劇定做宣傳活動，羅天宇都用呢部40萬寶馬Z4跑車代步，郭少芸梗係一坐即冧。
大家都叫阿芸，你有冇我咁有「食」力先？（設計對白）
