亞視喺周三（17日）公布咗港澳賽區入選嘅8個候選亞洲先生，高層葉家寶就話決賽會定喺下個月18日，實行送個大禮賀翌日搞台慶嘅無綫喎！佢仲話當日現場唔會好似無綫搞港男咁會有好多女人𠵱嘩鬼叫，但就可以歡呼，咁即係點呀？媽咪姐最估唔到係見到苟芸慧前男友羅天宇個細佬羅駿宇入圍。嘩，細佬倒戈，會唔會累到大佬俾無綫雪㗎？
羅駿宇同港男出身嘅哥哥羅天宇有同樣嘅陽光笑容，佢就覺得自己靚仔過哥哥喎。不過喺泰國讀國際學校畢業嘅佢講廣東話麻麻哋，似乎應該要好好向阿哥學習吓嘞！
自稱做娛樂公司「驚你」（經理）嘅陳俊原，面試時話已經幫亞視搵緊投資者入股。呢日見肥到漏嘅佢居然都可以入圍，令媽咪姐不禁懷疑亞視係咪真係咁需要佢「注資」呢？
