6月底喺布吉意外導致頸骨移位嘅Yumiko，同拍拖7年嘅化妝師男友Andy患難見真情，上週自爆男友終於向佢求婚，婚期暫定2014年。
FBI聽聞當眾跪地求婚，Yumiko除咗俾男友真誠打動外，據聞Andy專登搵人撲咗粒4卡嘅鑽石，家吓就拎咗去老闆嘅珠寶店鑲嵌。而Yumiko最緊張就係套婚紗，一班好姊妹徐濠縈、何超儀都畀吓意見，Yumiko決定去外地訂做，最快要8月後先可以到手；而新郎哥一直喜歡陽光海灘，Yumiko說好大機會唔喺香港搞，佢同FBI講︰「想喺海灘戶外搞，因為咩都要時間，最快都可能明年底或2014年初。」據知，婚禮費用預算100萬，當然由Andy埋單，聽聞佢哋仲周圍睇新屋，唔怪得Yumiko話婚後都要繼續做啦！
上週Yumiko喺微博宣布男友求婚，布吉嘅意外令佢同Andy感情更深厚，可以話係患難見真情。
