陳豪同陳茵媺打風打唔甩，陳豪之前仲拍心口保證，唔會學似吳卓羲同黃宗澤偷食內地乳牛，淨係會沖「正經愛心咖啡」畀同事飲，叫女友唔使擔心。
難得有得飲陳豪咖啡，但敏之當日塊面仲腫過之前，而且腎炎好難斷尾，唔好飲咁多咖啡喇！
陳豪呢個熟手磨豆樣，相信陳茵媺一定比陳敏之見得多
呢排唔使開工，敏之仲約咗李思蓓（右）等好姊妹食飯吹水，唞得就唞。
講得出做得到，女友忙緊拍《仁心解碼II》，陳豪果然冇搞搞震，留守香港同已經名花有主嘅陳敏之食飯，當日陳豪帶晒專業沖咖啡嘅器材，仲有成桶咖啡豆，搞到敏之鬼咁開心！沖咖啡冧同事，點都好過send裸照同情慾WhatsApp撩女上床吖！
法拉迫地鐵
同唱片公司星煥反晒面嘅陳法拉，恨做歌星咁耐，𠵱家出得一隻碟就話完約添！堂堂Neway大少奶搞成咁，以為法拉心情一定唔多好，偏偏佢仲有心情玩微博，將自己焗曲奇、睇書玩貓等師奶生活同人分享，連迫地鐵都要自拍！有傳法拉頻頻推劇得罪TVB高層，𠵱家又同唱片公司鬧翻，難得法拉處變不驚，道行的確高！
慳妹鍾嘉欣就會搭地鐵啫，估唔到老公大把靚車嘅法拉都會迫地鐵，奇！
唔係整嘢食就係同貓玩，法拉之前仲俾隻貓抓傷晒，心痛死大少！
河蟹體操王
德國體操王子Marcel Nguyen（阮馬素），喺今屆倫奧憑靚仔樣吸納咗大班粉絲，為進一步擴大勢力範圍，Marcel鎖定有13億人嘅中國，開咗個新浪微博。點知玩咗幾日，佢就喺fb話自己俾人河蟹咗！照計Marcel之前喺雙槓決賽輸咗畀國家隊選手馮喆，冇落到中國人面，新浪冇理由咁小器喎！
越南混德國嘅Marcel，微博由親家姐Denise用中文執筆，有時又會由Marcel自己用英文寫，點知唔夠1星期已被河蟹。
