美國便服名牌Abercrombie & Fitch（A&F）在中環開舖，派出近百裸男招呼港女，唔只癱瘓中環，連名媛、口靚模都陷入瘋狂狀態。日前許穎（Phoebe）偕師妹Cassie及Chole 到場攬仔，向來身材出眾Phoebe忽然封胸，佢話：「今日有好多對（胸），但我個胸只得一對咋。今日感覺幾high，好少機會同咁多外籍靚仔同場。」
上週六（11日），46歲名媛薛芷倫出席A＆F boys歡送派對，佢低胸貼身背心配Gucci短裙到場，成功速嗒一名年輕靚鬼仔，之後佢在場內狂歡跳舞，飲酒更飲到不省人事，凌晨4時多，由蘇民峰仗義送佢返歸。不過薛芷倫不滿被指夜蒲溝仔，之後微博上載同兩名A＆F boys合照，更表示：「不做需要男人的女人，而做男人需要的女人。」暗示自己被仔溝。
A&F boys瘋魔港女，但原來佢人工唔算高，好姨聽聞A&F搵肌男造勢以project形式計，由本月初造勢到下月初離開，薪酬約五位數，圍番時薪約百幾蚊。A&F唔會從模特兒公司請肌男，反而到泳池、健身房及沙灘等物色新血，但亦可到A&F網站自薦。港男陳志健就自爆兩個月前在港被自稱A&F職員老外約面試，因佢同TVB有約而冇緣合作。早前50多名肌男已離港，餘下約40名肌男會留到9月2日，想親親肌男姊妹，快把握機會啦！
