自從法定工資訂定每小時28蚊，TVB不時踩落旺區，借班街坊做免費老臨，連28蚊都慳番。
周日（12日），鍾嘉欣同陳智燊（Jason）係旺角行人專用區拍《幸福摩天輪》。劇情講Jason喺人海中搵嘉欣示愛，其間兩人感動到攬攬。
唔使多講，一向有觀眾緣嘅嘉欣落到旺角，大家都會諗到發生咩事。其實劇組一早安排咗兩個女工作人員同班臨記傍住嘉欣行，不過清一色都係手無寸鐵嘅妹妹仔，搞到「嘉欣團」喺瓊華中心對面，要兜去彌敦道再屈番入銀行中心，先入到行人專用區。場面直頭墟冚過CY落區呀！
玩特技
呢位外籍遊客埋唔到嘉欣身，索性企喺垃圾筒上面影相。位置係好，可惜危險性亦好大呢！
尷尬笑
鍾嘉欣無路可退，惟有走入附近嘅百老滙避難，點知班街坊追晒入去，結果齊齊被趕出舖外。
怕醜仔
陳智燊拍攬戲表現尷尬，鍾嘉欣卻情緒高漲，鏡頭外笑得非常開心。
