呢排無綫啲親生仔女好唔聽話，尤其黃宗澤同胡杏兒，有說雙方因有第三者而導致分手。無綫為免愈鬧愈大，局住停播佢哋劇集，轉而改播其他。
媽咪姐收到風，原本石沉大海、由周麗淇主演嘅《女警愛作戰》，最近拍咗個新結局，仲會喺台慶前播出。之前因合約問題，同無綫關係麻麻嘅周麗淇一知道劇集鹹魚翻生，即時笑住說：「如果真係台慶前播就梗係開心啦！早排我哋先拍咗個新ending，將原本嘅結局駁長。（同TVB關係如何？）不嬲都好好！」估唔到黃宗澤胡杏兒分手，得益嘅居然係周麗淇。
早知係咁，我哋就唔分手啦！（設計對白）
早排無綫喺深水埗補拍《女警愛作戰》新結局，仲封咗成條街拍槍戰場面，相當認真。當日氣溫高達33度，但為咗連戲，周麗淇依然着住冬季警服拍攝。
