古仔同青雲已經喺泰國拍緊新片《逃出生天》，咁靚仔梗係有人要合照喇。
謝霆鋒同劉青雲合作嘅新戲《消失的子彈》已經喺內地上映，七日收咗7千幾萬人民幣，成績同口碑都幾好，難得同青雲合作，唔怪得霆鋒都想喺郭子健執導、以消防員做題材嘅新戲中再同青雲一較高下。
但係郭子健嗰邊唔知乜嘢原因，新戲遲遲未開拍，結果俾彭氏兄弟搶先一步搵咗青雲，拍攝同樣係以消防員做古仔嘅新戲《逃出生天》，仲請埋同青雲有票房保證嘅《竊聽風雲》組合好拍檔古天樂，加上彭順老婆李心潔，兩王一后配合埋3D效果，相信幾有睇頭。
霆鋒繼《消失的子彈》中同青雲合作後，原本想再合作，但可能未必成事。劇照
余文樂執二攤青雲同古仔近日已經喺泰國開工，戲中佢哋都係演消防員，為切合角色，古仔剪短頭髮，本身黑黑實實嘅佢着上消防員制服，真係喺邊度搵到咁有型嘅消防員。
據知青雲已經拍咗《逃》片，好大機會唔再拍郭子健嗰套，咁搵邊個頂？馮仁昭聽到話搵咗當年同霆鋒傳不和嘅余文樂，如果真係合作，唔知佢哋會唔會擦出火花？但係霆鋒11月又要扮「刀仔」同發哥周潤發拍《賭神4》，唔怪得郭子健露口風要延遲到年尾先開到。
