林峯同容祖兒會喺下個月舉行嘅演唱會同台鬥舞。
容祖兒、陳偉霆同林峯噚日喺九展出席9月舉行嘅「新城數碼．巨星靚聲音樂會」記招，有份演出嘅林欣彤（Mag）因病缺席。祖兒透露音樂會上會同林峯鬥舞之外，仲希望同Mag合唱電影主題曲：「首歌我好鍾意，所以希望佢快啲康復，自己都係過來人曾經失聲，心情係好緊要好影響。」雖然公開咗同師兄劉浩龍嘅戀情，不過每次問祖兒有關感情問題，佢都絕口不提。其實師兄都有份主演電影《DIVA華麗之後》，問祖兒點解唔見師兄出席宣傳？佢話：「冼色麗都有份做，佢都唔係次次出席。」問係咪公司下禁令，唔畀祖兒同師兄同場，祖兒話：「唔答喇，我唔知，你哋幫我問公司。」
祖兒同胡歌喺電影《DIVA》合作，祖兒仲教胡歌廣東話。劇照
有份做《DIVA》嘅劉浩龍，一直冇出席過宣傳。資料圖片
單日輸俾《低俗喜劇》林峯噚日接受商台電話訪問時被問到會唔會送隻碟畀緋聞女友吳千語？佢話：「我個個朋友都會送，係朋友都應該自己去買碟。」佢又話上次俾人影到食飯，係一大班人，佢當係提早宣傳電影。
另外，祖兒主演嘅《DIVA》前日首日上映，單日票房有32萬，而同樣有杜汶澤主演、做咗8日嘅《低俗喜劇》，同日單日收112萬，大比數KO《DIVA》。
