《今日我至魔》
余文樂又煲煙又爆粗又亂丟煙頭，行為同佢個魔鬼車牌「666」相當脗合。
愛車如命嘅余文樂最近又豪花81萬買新車，今次佢嘅新歡係黑色Range Rover Evoque越野車，屬三門Dynamic Edition，上個月31號先至落地，前晚樂仔去灣仔同朋友飲嘢吹水，就係揸住呢部新車出巡。
前晚七點，記者見到余文樂喺灣仔星街一間餐廳同兩個男性朋友飲咖啡傾偈，其中一個係著名攝影師夏永康。至於樂仔新落地嘅Range Rover Evoque就泊咗喺餐廳附近，佢將以前「666」嘅靚車牌套咗落新車度，但車窗就違例安裝咗黑玻璃。樂仔喺餐廳外面露天位置同兩個老友吹水吹到好興奮，除咗見佢全程手舞足蹈之外，仲成日聽到佢講粗口。
灣仔星街
露天吹水
着衫走人
扯煙亂丟
亂丟煙頭樂仔同夏永康等人一路煲煙一路傾，最令人奇怪嘅係枱面明明有煙灰缸擺喺度，但樂仔都要將煙頭隨手丟落地下，仲要係唔整熄支煙就咁丟嗰種，真係好冇公德心。夏永康夜晚8點幾就先行離開，至於樂仔同另一朋友就吹水到9點先至鬆人，跟住樂仔就揸部新車接載朋友離開。
原來，喺電影《春嬌與志明》北京外景部份，樂仔已經喺戲中揸過同型號嘅Range Rover Evoque，相信當時樂仔已經對呢部車嗒糖，所以拍完戲之後即刻落訂。
