媽咪姐呢排同大家一樣，晚晚食住飯、煮住消夜嚟追奧運！之不過，到時到候，點都要轉番台，《怒火街頭2》唔miss得嘅，追開有感情，梗要睇吓「Law霸」同「王思苦」幾時終成眷屬㗎嘛。所以話呢，我哋呢啲師奶仔真係好鬼忙！反而「Law霸」鄭嘉穎就疏乎嘞，依家人紅咗，可以揀劇拍，早前仲趁得閒，去咗泰國放雀㖭！
專人服侍
視帝拜神有泰國神婆服侍，幫佢攞雀，再教佢逆時針咁圍住四面佛行，每面放一隻。
就啱啱上個月之嘛，07年開始信佛嘅佢，又一支公去曼谷拜四面佛。平時chok慣嘅視帝，嗰日就攞住幾籠雀，同大班師奶街坊迫埋一齊。見佢一邊聽住身邊嗰位泰國人嘅指示，一邊雞手鴨腳咁放雀。Well，呢個場面，經典呀！話說我哋平日買啲香呀祭品呀，一百蚊有找！但好似「Law霸」呢種放雀祈福形式，就差唔多要使成千蚊，貴十倍㗎！而且要同啲工作人員夠熟先可以做。
咁單計視帝拍國內劇嘅片酬，由上年拍《步步驚心》大紅後，從8萬一集跳到依家成20萬，俾嗰區區一千蚊，真係濕濕碎啦。最緊要係四面佛繼續保祐，而佢自己就生生性性，唔好似吳卓羲、黃宗澤咁亂食搞出禍啫！
拜神騷肌
上年拍完《拳王》之後，鄭嘉穎都keep住做吓gym，見佢攞住啲花許願同跪住上香嗰陣，手臂差啲大過髀！
09年絕地一拜
3年前，鄭嘉穎俾佘詩曼狠飛，成日黑面得罪傳媒，又無望同「柴九」黎耀祥爭視帝，於是跟住老表王賢誌去泰國拜四面佛。嗰次鄭生仲俾咗幾百蚊請泰女跳許願舞，而呢兩年佢拍到啲好劇，人氣返晒嚟，難怪今次再落重本！不過都係嗰句，拜乜嘢神都好，做好自己最緊要。
上年翻生
上年，霉咗一輪嘅鄭嘉穎憑《怒火街頭》再做視帝。而喺國內清裝劇《步步驚心》扮八阿哥，又大受歡迎，忽然紅咗！你話，點可以唔去放雀祈福還神呢？
