《今日我至乖》
超蓮前日落街買燒味？皆因得罪咗阿媽，要斬料賠罪囉！
《銅鑼灣跑馬地》
相信喺賭王眾多子女當中，最靚最得人心嘅非三房細女何超蓮莫屬，前日下晝5點幾，着熱褲同闊領衫嘅超蓮同兩個女性朋友喺銅鑼灣shopping，佢其中一個朋友嘅紫色頭髮勁搶眼。
先開餐
買蛋糕
掃薯片
電暈仔
精神恍惚行錯路超蓮三人去咗紅螞蟻餐廳開飯，之後佢去世貿一餅店買蛋糕，不過超蓮精神有啲恍惚，行錯咗兩次路，買完餅後就上番自己架私家車離開。司機載超蓮去跑馬地一間燒臘店，身為千金小姐嘅佢親自買咗兩盒燒味，然後去便利店買薯片同飲品。
問超蓮做乜愁眉深鎖，佢話：「同媽咪嘈咗交呀。」佢拜託記者幫佢同媽咪道歉喎，睇嚟佢嗰兩盒燒味同蛋糕，梗係用嚟番媽咪啦！
